पोखरा । उत्तर प्रदेशको प्रयागराजमा सवारी दुर्घटना हुँदा १० श्रद्धालुको मृत्यु भएको छ । १९ जना घाइते भएका छन् ।

मेजाको प्रयागराज–मिर्जापुर राजमार्गमा शुक्रबार राति बोलेरो र बसबीच आपसमा ठोक्किदा महाकुम्भमा स्नान गर्न गएका १० श्रद्धालुको मृत्यु भएको भारतीय सञ्चारमाध्यमले जनाएका छन् ।

भक्तजन बोकेको बोलेरो र बोलेरो बस एक आपसमा ठोक्किँदा बोलेरोमा सवार १० भक्तजनको घटनास्थलमै ज्यान गएको हो । ती सबै छत्तीसगढको कोरबा जिल्लाका बासिन्दा रहेको र संगम स्नान गर्न जाँदै गरेको बताइएको छ ।

अर्कोतर्फ बसमा सवार १९ जना पनि दुर्घटनामा घाइते भएका छन् । यी मानिसहरू संगममा स्नान गरेर वाराणसी फर्किरहेका थिए। घाइते सबैलाई सीएचसी रामनगरमा भर्ना गरिएको बताइएको छ । बसमा सवार सबै मध्य प्रदेशको राजगढ जिल्लाका बासिन्दा हुन् ।

प्रहरीले दुर्घटना बारे अनुसन्धान गरिरहेको जनाएको छ ।