स्याङ्जाको आँधीखोला गाउँपालिकाद्वारा आयोजित पाचौं राष्ट्रपति रनिङ शिल्डको उपाधि त्रि – शहिद नमूना माविले जितेको छ ।

७ स्वर्ण, ४ रजत र ३ कास्य गरी १४ पदकसहित त्रि – शहिद नमूना माध्यमिक विद्यालयले ६० हजार रुपियाँ नगदसहित रनिङ शिल्ड, ट्रफी र प्रमाणपत्र हात पारेको हो । यो उपाधि जितेसङ्गै त्रि – शहिद नमूना मावि लगातार चौंथो पटक उपाधि विजेता बनेको हो ।

आँधीखोला गाउँपालिका -५ स्थित प्रधुम्न पनेरु माविको खेलमैदान, रङ्गेठाँटीमा भएको प्रतियोगितामा ४ स्वर्ण, १ रजत र ३ कास्य गरी ८ पदकसहित दोस्रो भएको प्रधुम्न पनेरु माविले ४० हजार रुपियाँ नगदसहित ट्रफी र प्रमाणपत्र पाएको हो ।

यसैगरी, ३ स्वर्ण, २ रजत र १ कास्य पदकसहित तेस्रो बनेको श्रवण माविले २० हजार रुपियाँ नगदसहित ट्रफी र प्रमाणपत्र र १ स्वर्ण, २ रजत गरी ३ पदकसहित सान्त्वना बनेको राष्ट्रिय माविले १० हजार रुपियाँ नगद प्राप्त गरेको आँधीखोला गाउँपालिकाका अध्यक्ष विश्वनाथ पौडेलले जानकारी दिए ।

प्रतियोगितामा छात्र र छात्रा दुवैतर्फको भलिबल, कबड्डी, रिले दौड, विभिन्न दुरिमा दौड, हाइजम्प, लङ्गजम्प, सटफुट, छेलो हान्नेलगयतका खेल भएका थिए ।

यस्तै, वडा स्तरको शिक्षक भलिबल प्रतियोगितामा प्रथम वडा –१ ले २० हजार रुपियाँ, द्वितीय वडा –२ ले १५ हजार रुपियाँ र तृतीय वडा –३ ले १० हजार रुपियाँ प्राप्त गरेको थियो ।

यसैगरी, प्रतियोगिताको उद्घाटनमा मार्चपास अन्तर्गत उत्कृष्ट स्थान हासिल गरेको आँधीखोला अङ्ग्रेजी बोर्डिङ विद्यालयलाई पाँच हजार रुपियाँ नगदसहित सम्मान गरिएको थियो ।

पुस २२ गतेदेखि भएको प्रतियोगिताका विजेता तथा उपविजेताहरुलाई गाउँपालिका अध्यक्ष विश्वनाथ पौडेलले पुरस्कार वितरण गरेका थिए । तीन दिनसम्म चलेको कार्यक्रमको समापनमा अध्यक्ष पौडेलले खेलकुदले विश्वमै पहिचान बनाएको बताउँदै शिक्षासङ्गै खेललाई प्राथमिकतामा दिएर अगाडि बढाएर विद्यार्थीहरुलाई खेलकुदप्रति आकर्षित र प्रोत्साहन गर्न पालिका सधैं साथमा रहेको बताए ।

आयोजित राष्ट्रपति रनिङ शिल्डमा पालिकाभित्रका विभिन्न निजी तथा सामुदायिक विद्यालयहरु गरि १२ विद्यालयका शिक्षकहरु, शिक्षिकाहरु, विद्यार्थीहरुलगायत अभिभावकहरुको सहभागी रहेको थियो ।

यसैबीच, कार्यक्रममा ६० मुरी धान उत्पादन गर्ने कृषक मीन बहादुर नेपालीलाई आठ हजार रुपियाँ नगद र नव उद्यमी पदम प्रसाद पनेरुलाई ३५ हजार रुपियाँ नगद प्रदान गरिएको थियो ।