पोखरा । कास्कीको अन्नपूर्ण गाउँपालिका–१० घान्द्रुकमा जीप दुर्घटना हुँदा मृत्यु एक महिलाको मृत्यु भएको छ । अस्पताल ल्याइनसकेकाले प्रहरीले पुष्टि गरेको थिएन ।

जीप दुर्घटना हुँदा मुस्ताङको थासाङ गाउँपालिका १ टुकुचे बस्ने ७० वर्षीया भिमकुमारी थकालीको घटनास्थलमै मृत्यु भएको हो । घाइते भएका अन्य ४ जनाको पनि पहिचान खुलेको छ ।

पोखराबाट घान्द्रुक जाँदै गरेको ग १ ज ६८२१ नम्बरको स्कारपियो जीप घान्द्रुकको बतासे डाँडामा आज दिउँसो दुर्घटना हुँदा ४ जना घाइते र एकजनाको मत्यु भएको थियो ।

घाइते मध्ये ४ जनाको सिम्रिक एयर मार्फत् उद्धार गरेर मणिपाल शिक्षण अस्पताल उपचार भइरहेको जिल्ला ट्राफिक कार्यालय कास्कीका सूचना अधिकारी शिवप्रसाद पाठकले जानकारी दिए ।

दुर्घटनामा परी पोखरा महानगरपालिका–१६ दीप बस्ने २० वर्षीया रिहाना थकाली, मुस्ताङको थासाङ गाउँपालिका–१ घर भएका ३१ वर्षीया ज्योति खत्री थकाली घाइते भएका हुन् । जीपमा सवार बागलुङको गलकोट नगरपालिका १ झाँक्रीस्थान बस्ने ७६ वर्षीया खिमकुमारी खत्री, अन्दाजी ५० वर्षीया नविना खत्री घाइते भएकी छिन् ।

घाइते चारै जनाको शरिरका विभिन्न भागमा चोट लागेको छ । उनीहरुको अवस्था मध्यम रहेको प्रहरीले जनाएको छ ।

यस्तै, बागलुङको गलकोट नगरपालिका–१ झाक्रीस्थान बस्ने ४० वर्षीया अनिता खत्री सकुशल रहेको प्रहरीले जनाएको छ ।

सवारी चालक स्याङ्जाको भिरकोट नगरपालिका २ डाँडाकोट बस्ने ४३ वर्षीय गोविन्द श्रेष्ठलाई प्रहरीले नियन्त्रणमा लिएको छ ।

प्रहरीका अनुसार ग१ज ६८२१ नं. को स्कारपियो जीप विकासे डाँडामा पुगेपछि अफ्ठ्यारो सडकका कारण रोकिएको थियो ।

चालक श्रेष्ठ र यात्रु अनिता अगाडि सडकको अवस्था हेर्न जानेक्रममा जीप पछाडि गुडेर सडकबाट करिब छ सय मिटर तल भिरमा अड्किन पुगेको प्रहरीले जनाएको छ ।

दुर्घटनालगत्तै प्रहरी चौकी घान्द्रुक, प्रहरी चौकी बिरेठाँटी र वडा प्रहरी कार्यालय बगरबाट टोली खटिएर निकै अफ्ठेरो भिरबाट यात्रुको उद्दार गरी हेलिकोप्टरमार्फत उपचारका लागि पोखरा ल्याइएको हो ।