काठमाडौं । प्रधानमन्त्री केपी शर्मा ओलीविरुद्ध चर्को नाराबाजी गर्ने राष्ट्रिय स्वतन्त्र पार्टी (रास्वपा) का पाँच दर्जन नेता–कार्यकर्ता पक्राउ परेका छन् ।

प्रधानमन्त्रीको निवास बालुवाटारमा भेला भएर सरकारविरुद्ध प्रदर्शनमा उत्रिन खोजेका रास्वपाका कार्यकर्ताहरुलाई प्रहरीले नियन्त्रणमा लिएको हो ।

पार्टी सभापति रवि लामिछाने सहकारी ठगीमा पक्राउ परेपछि रिहाइ माग गर्दै रास्वपाले मंगलबार बालुवाटार केन्द्रित प्रदर्शन गरेको छ । सो क्रममा नेता कार्यकर्ताले प्रधानमन्त्री केपी शर्मा ओलीविरुद्ध चर्को नाराबाजी गरिरहेका छन् ।

प्रदर्शनका क्रममा निषेधित क्षेत्र तोड्न खोज्ने नेता कार्यकर्तालाई पक्राउ गरिएको जिल्ला प्रहरी परिसर काठमाडौँले जनाएको छ । उनीहरूलाई विभिन्न प्रहरी वृत्तमा राखिएको छ।

उनीहरू निषेधित क्षेत्रमा प्रदर्शन गरेका कारण पक्राउ परेका हुन्। बालुवाटार प्रधानमन्त्री निवास पनि भएकाले सुरक्षा संवेदनशीलताको कारण देखाउँदै जिल्ला प्रशासन कार्यालय काठमाडौंले निषेधित क्षेत्र तोकेको छ।

गत कात्तिक २ गते लामिछाने पक्राउ परेसँगै रास्वपाले निरन्तर प्रदर्शन गर्दै आएको छ ।