पोखरा । सहकारी रकम अपचलन गर्ने रास्वपाका सभापति रवि लामिछानेलाई पक्राउ गर्न माग गर्दै सहकारी पीडितहरूले सोमबार कास्की जिल्ला प्रशासन अगाडि प्रदर्शन गरेका छन् ।

सबैभन्दा रोचक दृश्य यस्तो देखियो कि, उनीहरूले नाराबाजी र प्रदर्शन गरिरहँदा रास्वपाका कार्यकर्ताहरूले भने सभापति लामिछानेलाई फसाउन पाइँदैन भन्दै प्रदर्शन गरिरहेका थिए ।

पीडितहरूले रास्वपाका कार्यकर्ताहरु तिर फर्किएर सहकारी ठग मुर्दावाद नारा लगाएका थिए । सहकारीपीडितले जनतालाई ठग्न पाइँदैन भन्दै नाराबाजी गरेका हुन् ।

पोखराका सूर्यदर्शन लगायतका सहकारीका पीडितहरूले प्रशासनको गेट अघि नै प्रदर्शन गरेका हुन् । जिबी र रबिका व्यावसायिक साझेदार छविलाल जोशीलाई जिल्ला अदालतमा उपस्थित गराइएको छ। त्यही समयमा सहकारी पीडितहरूले प्रशासन अगाडि प्रदर्शन गरेका हुन् ।

सहकारीको पीडितहरूले लामिछानेले पनि बचत अपचलन गरेको भन्दै गत माघमा जाहेरी दिएका थिए । र, पूरक जाहेरी अब प्रहरीले अगाडि बढाउने भएको छ ।