स्याङ्जाको हरिनास गाउँपालिका -२ पुछौदीमा संचालनमा रहेको फर्निचर उद्योगबाट सामान चोरी गर्नेलाई पक्राउ गरिएको छ ।

पक्राउ पर्नेमा भारत बिहार राज्य बेतियाग्राम पंन्चायत ईनर्वा -५ बस्ने ३० वर्षीय मनोज कुमार महतो रहेको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए । महतो बालकृष्ण सिग्देलले संचालन गरेको होमिक्स समिल फर्निचर उद्योगमा काम गर्दै आएका थिए ।

डिएसपी रानाका अनुसार महतोले शुक्रबार राती उक्त फर्निचर उद्योगमा रहेको जेनरेटर, कम्प्रेसर मेसिन, खराद मेसिन, रन्दा कटर साईजर मेसिन डाईनामो, नट बोल्ट खोल्ने रिन्चिहरू समेत चोरी फरार भएका थिए ।

फरार भएका महतोलाई शनिबार स्याङ्जा प्रहरीले पर्सा बिरगंज महानगरपालिका -१६ बिरगंज बसपार्क हाताभित्रबाट पक्राउ गरिएको र सामानहरु समेत बरामद गरिएको डिएसपी रानाले बताए ।

पक्राउ परेका महतोलाई चोरी तथा डाँका सम्बन्धी कसूर मुद्धा दर्ता गरी सोमबार स्याङ्जा अदालतबाट म्याद थप लिएर आवश्यक अनुसन्धान कार्य अगाडि बढाइएको प्रहरी कार्यालयले जनाएको छ ।