पोखराको हर्पन खोलामा पौडी खेल्ने क्रममा डुबेर २ युवकको मृत्यु भएको छ।

शुक्रबार दिँउसो ३ः४५ बजेको समयमा पोखरा महानगरपालिका–२३ घाँटीछिनास्थित हर्पन खोलामा पौडी खेल्ने क्रममा दुई युवकको मृत्यु भएको हो ।

मृत्यु हुनेमा पोखरा महानगरपालिका–१ मोहरिया टोल बस्ने १८ वर्षीय प्रकृत बुद्धचार्य र पोखरा महानगरपालिका–२ बाग्लुङ बसपार्क बस्ने १८ वर्षीय स्वयम् ताम्राकार रहेको प्रहरीले जनाएको छ ।

पौडी खेल्ने क्रममा नदीमा डुबेर बेपत्ता भएका उनीहरूको गोताखोरसहित प्रहरी टोलीले दिँउसो ०४ः४५ बजे शव फेला पारेको हो । दुवै जनाको शव पोष्टमार्टमका लागि पोखरा स्वास्थ्य विज्ञान प्रतिष्ठानमा राखिएको छ।

उनीहरु ६ जनासाथी मिलेर पौडी खेल्न गएको र अन्य ४ जना सकुशल रहेको प्रहरीले जनाएको छ।

चार दिन अघि साउन १ मा मात्रै यसै ठाउँमा डुबेर धादिङ त्रिपुरासुन्दरी गाउँपालिका वडा नं. ७ लपाङ घर भई हाल पोखरा महानगरपालिका वडा नं. ८ नागढुंगामा ससुराली बस्दै आएका २५ वर्षीय सन्तोष सिंखडाको मृत्यु भएको थियो ।