जिल्ला प्रशासन कार्यालय स्याङ्जाले गएराती गएको पहिरोमा परि ज्यान गुमाएका परिवारका सदस्यलाई आर्थिक सहयोग गरेको छ । अवरिल वर्षाको कारण गएको पहिरोले घर पुरिँदा घरमा सुतिरहेका फेदिखोला गाउँपालिका -५ बाँगेका ३१ वर्षीय दुर्गा जिटि र उनकी ३ वर्षीय छोरी निसिकाको मृत्यु भएको थियो ।

स्याङ्जाका प्रमुख जिल्ला अधिकारी सुनिता नेपालको नेतृत्वमा जिल्ला प्रहरी कार्यालय स्याङ्जाका प्रमुख प्रहरी उपरीक्षक शालिग्राम शर्मा र स्याङ्जा जिल्ला अस्पतालका चिकित्सकहरुको टोलि घटनास्थलमै पुगेर सहयोग रकम प्रदान गरेको हो । घटनाका पीडितलाई संघीय सरकारबाट प्राप्त आर्थिक सहयोगको रकम प्रजिअ नेपालले हस्तान्तरण गरेकी हुन् ।

पीडित परिवारलाई थप राहतको रकमहरु पछि उपलब्ध गरिने बताउँदै पहिरोमा परि ज्यान गुमाएका आमाछोरीको शव परिक्षण गरी आफन्तलाई बुझाइएको प्रहरी उपरीक्षक शर्माले जानकारी दिए ।

पहिरोले ढुङ्गा, माटो र टिनले छाएको एक तले घर र घर नजिकैको गोठ पुरेको थियो भने गोठमा रहेको एउटा भैँसीको समेत मृत्यु भएको प्रहरी कार्यालयले जनाएको छ ।