सुदूरपश्चिमबाट गण्डकी प्रदेश राजधानी पोखरा आइपुगेको प्रदेश सभा सदस्यहरु र गण्डकी प्रदेश प्रमुख डिल्लीराज भट्टबीच विहीबार भेटवार्ता भएको छ ।

सुदूरपश्चिम प्रदेशसभा, सामाजिक विकास समितिको अन्तरप्रदेश भ्रमणका क्रममा गण्डकीको पोखरा आइपुगेका समितिका सभापति शिवराज भट्ट, सदस्यहरु प्रकाश बम, जानकी पौडेल कुँवर, तुलसी देवकोटा धर्मराज पाठकले प्रदेश प्रमुख भट्टलाई भेट गरी बधाई तथा शुभकामना व्यक्त गरे ।

मुलुकका प्रदेशसभाहरुले गरेको कार्यसम्पादन, अभ्यास बुझ्नुका साथै अनुभव आदानप्रदान एवं काममा एकरुपता कायम गर्ने सवालमा भ्रमण फलदायी हुने विश्वास लिएको समिति सभापति शिवराज भट्टले बताए ।

उनीहरुले गण्डकीको अभिभावकका रुपमा सुदूरका सर्वमान्य नेतालाई पाउँदा गौरव महसुस गरेको बताए ।

प्रदेश प्रमुख भट्टले सुदूरपश्चिमबासीको आशिर्वादले यो स्थानमा रहेको बताउँदै भ्रमण उपलब्धिमूलक रहोस् भनी शुभेच्छा व्यक्त गरे ।