पोखरा । सर्वोच्च अदालतको परमादेशबाट पदमुक्त मुख्यमन्त्री खगराज अधिकारीले सरकारी निवास छाडेका छन् ।

आदेशपछि नै निजी निवासमा सुतेका अधिकारीको सचिवालयले आज सरकारी निवासमा रहेका आफ्ना सामान सारेर चाबी समेत कार्यालयलाई बुझाएको छ । मुख्यमन्त्रीले पाउने सुविधाको गाडी उनले हिजै फिर्ता गरिदिएका थिए । अस्तिदेखि नै गाडी चढेका थिएनन् ।

गणतन्त्र दिवसका अवसरमा मंगलबार बिहान आयोजित समारोहमा उनले आफू पदमा लिप्त हुन चाहाने व्यक्ति नभएको र नियमविपरीत गएर कुनै सुविधा नलिने बताएका थिए ।

उनले भने, ‘सर्वोच्चको आदेश आउँदा म पोखराकै खहरेमा थिएँ, अर्को मुख्यमन्त्रीले शपथ नलिएसम्म मैले सुविधा लिएको भए पनि हुनेथियो, तर त्यसो गरिन, सरकारी गाडी हिजै फिर्ता गरिदिएँ । आज पैदलै आएको छु ।’

स्वास्थ्यमन्त्री र गृहमन्त्री हुँदा पनि आफूले अतिरिक्त सुविधा नलिएको दाबी गर्दै उनले पेन्सन र पजेरो कान्डमा आफू नफँसेको स्पष्टीकरण दिए । गृहमन्त्री हुँदा सुराकी वापतको रकम र पिए समेत नलिएको उनले बताए ।

उनी संघीय सरकारमा १३ दिन गृहमन्त्री भएका थिए । सर्वोच्चले कांग्रेसका शेरबहादुर देउवालाई प्रधानमन्त्रीमा नियुक्त गर्न परमादेश जारी गरेपछि केपी ओली नेतृत्व सरकार ढलेसँग अधिकारी स्वतः पदमुक्त भएका थिए । यहाँ पनि सर्वोच्चकै परमादेशबाट पदमुक्त भएका छन् ।

पूर्व मुख्यमन्त्रीको हैसियतमा आफूले कुनै अतिरिक्त सुविधा नलिने र यसमा कुनै चिन्ता नलिन अधिकारीले प्रमुख सचिव लक्ष्मीकुमारी बस्नेततर्फ इंगित गर्दै भने । ‘मैले विपक्षी दलको नेताका हैसियतमा पाउने सुविधा लिन्छु, त्यसवाहेक केही लिन्न,’ उनले भने ।

उनी पछिल्लोपटक चैत २५ गते मुख्यमन्त्रीमा नियुक्त भएका थिए । यसै संसद कार्यकालमा अघिल्लोपटक पनि उनी १ सय ५ दिन मुख्यमन्त्री बनेका थिए ।