पोखरा । राष्ट्रिय प्रजातन्त्र पार्टी (राप्रपा) को ३५ औं स्थापना दिवसको अवसरमा पोखरामा नि:शुल्क स्वास्थ्य शिविर कार्यक्रम सम्पन्न भएको छ ।

पार्टीको भातृ संगठन राष्ट्रिय प्रजातान्त्रिक युवा संगठन कास्कीले आयोजना गरेको शिविर पोखराको पृथ्वीचोक स्थित शिव टोलमा संचालन गरिएको थियो।

पार्टीको स्थापना दिवस जनताको सेवा गर्दै मनाउने हेतुले नि:शुल्क स्वास्थ्य शिविर राखिएको राप्रपा कास्कीका अध्यक्ष नारायण गुरुङले बताए। “हामी जस्ता राजनीतिक दलहरुबाट जनताले अपेक्षा गर्ने भनेकै सेवा हो ” उनले भने ” राप्रपा कास्की सधैं जनता संग नजिक भएर काम गरिरहेको छ। “

संगठनले पद्म नर्सिङ्ग होम प्रालिको विशेष सहयोगमा पोखरा पृथ्वीचोकको शिव टोलमा निशुल्क स्वास्थ्य शिविर कार्यक्रम गरेको हो ।

स्वास्थ्य शिविर कार्यक्रमबाट करिब ५०० जना लाभान्वित भएको राष्ट्रिय प्रजातान्त्रिक युवा संगठन कास्कीका अध्यक्ष राजेश पोखरेलले बताए।