पोखरा । कास्की प्रहरीले सवारी जाँचपास फेल भएका ९ र जाँचपास नभएका २ गरी ११ गाडी नियन्त्रणमा लिएको छ ।

बुधबारदेखि अभियानकै रुपमा जिल्ला ट्राफिक प्रहरी कार्यालयले प्रहरी टोली खटाइ सवारी साधन चेकजाँच तथा कारबाही प्रक्रिया तीव्र पारेकोमा बिहीबार ११ साधन फन्दामा परेका हुन् ।

सार्वजनकि भाडाका सवारीसाधनले समयमा सर्भिसिङ नगर्ने, सवारीसाधनको जाँचपास नगर्ने र कालो धुँवा फाल्ने गरी मानव स्वास्थ्यमा असर पारेको जनगुनासो बढेपछि अभियानकै रुपमा सो कारबाही प्रक्रिया थालिएको जिल्ला ट्राफिक प्रहरी प्रमुख प्रहरी निरीक्षक भानु शर्माले बताए ।

यातायात व्यवस्था कार्यालय कास्की र जिल्ला ट्राफिक प्रहरी कार्यालयबाट संयुक्तरुपमा खटिएको टोलीले बुधबार विपीचोकमा प्रदुषण अनुगमन एवं चेकजाँच गर्दा डिजेलबाट संचालित ३५ सवारीसाधनमध्ये ३० वटालाई सवारीसाधन मापदण्ड विपरीत फेल भएको पाइएकोले उक्त सवारीसाधन नियन्त्रण लिई थप कानुनी कारबाहीका लागि यातायात व्यवस्था कार्यालयमा पठाइएको छ ।