पोखरा। परिक्षाको प्रश्नपत्र आउट गराएको अभियोगमा प्रहरीले दुई जनालाई पक्राउ गरेको छ।

पोखरा महानगरपालिका -११ फूलबारी स्थित शिवशक्ति माविमा संचालन भइरहेको कक्षा १२ को परिक्षाको प्रश्नपत्र आउट गरेको अभियोगमा प्रहरीले दुई जनालाई पक्राउ गरेको हो।

प्रहरीका अनुसार सोमबार बिहान अन्दाजी ९ बजे कक्षा १२ को सामाजिक शिक्षा विषयको प्रश्नपत्र विद्युतीय माध्यमबाट बाहिरिएको भन्ने सूचनाको आधारमा वडा प्रहरी कार्यालय रामबजार र गण्डकी प्रदेश प्रहरीबाट खटिएको प्रहरीको टोलीले प्रश्नपत्र आउट गर्ने पोखरा -११ फूलबारी बस्ने ३९ वर्षीय नारायण वास्तोला र सोही ठेगाना भएका ३७ वर्षीय रामचन्द्र वास्तोलालाई पक्राउ गरेको हो।

प्रहरीले उनीहरूको साथबाट कक्षा १२ को थप उत्तर पुस्तिका ८ थान र मोवाइल ३ वटा वरामद गरेको छ। भने, उनीहरूलाई शिक्षा ऐन २०२८ अन्तर्गतको कसुरमा जिल्ला अदालतबाट अनुमति लिएर आवश्यक अनुसन्धान तथा कारवाही प्रक्रिया अगाडि बढाएको जिल्ला प्रहरी कार्यालय कास्कीले जनाएको छ।