पोखरा । पोखरा महानगरपालिका वडा नं. १५ को आयोजना तथा नेपाल रेडक्रस सेसाइटी पोखरा १५ उपशाखा कास्कीको व्यवस्थापनमा वडा अन्तर्गतका विद्यालय स्तरीय उपचार सेवा तालिम सम्पन्न भएको छ ।

तालिममा पोखरा १५ स्थित सामुदायिक तथा निजी गरी १४ विद्यालयका छात्र र छात्रा गरी २८ जना सहभागी रहे । प्रशिक्षकहरु गणेश भण्डारी र सूर्य तिमिल्सिनाले सहजीकरण गरेका छन् ।

तालिमको शुभारम्भ गर्दै प्रमुख अतिथि पोखरा वडा नं. १५ का अध्यक्ष तोरणबहादुर बानियाँले अब पूर्वाधार निर्माण तथा भौतिक संरचना निर्माणले मात्र विकास भएको नमानिने, उच्च अध्ययनले मात्र विद्वान नमानिने र सुविधायुक्त जीवनयापनले मात्र सम्पन्न नमानिने भन्दै मानवीय विकास, सामाजिक सेवा भावनाले मात्र ईज्जतिलो जीवन र मानव हुनुको अर्थ रहने बताए ।

यसका लागि विद्यालय तहदेखि नै बालबालिकालाई मानवीय भावनाको विकास, सामाजिक सेवाले ओतप्रोत बनाउँदै लैजानुपर्ने र यसका लागि रेडक्रसले महत्वपूर्ण भूमिका निर्वाह गरेको बताए ।

विद्यालयमा भैपरी रुपमा हुन सक्ने घटना, समाजमा आकस्मिक रुपमा हुने दुर्घटनामा घटनास्थलमै पुगी प्राथमिक उपचार गर्नुपर्ने हुँदा यसका लागि तयार रहनुपर्ने आवश्यकता बोध गरी प्राथमिक सेवा उपचार सम्बन्धी तालिम आयोजना गरेको उनले बताए ।

नेपाल रेडक्रस सोसाइटी, पोखरा वडा नं. १५ उपशाखा सभापति कमल पौडेलको अध्यक्षतामा भएको कार्यक्रममा रेक्रस कास्कीका जुनियर युवा संयोजक रमेश भण्डारी, उपशाखा सचिव शिव भण्डारी, कार्यक्रम संयोजक तथा उपशाखा उपसचिव शर्मिला पौडेल लगायतले बोलेका थिए । कार्यक्रममा वडा सचिव कृष्णप्रसाद गौतम, सिद्ध माविकी सहायक प्रधानाध्यापक जुना थापा लगायत उपस्थित थिए ।