बैंकिङ कसुर मुद्दामा संलग्न हेटौंडाका समित चन्द्र राजभण्डारी पोखरामा पक्राउ परेका छन् । झण्डै २५ लाख तिर्न नसकी जेठ ३० गतेदेखि फरार उनलाई बुधबार पोखरामा पक्राउ गरिएको हो ।

चन्द्र केसीले दिएको जाहेरीमा उच्च अदालत पाटनबाट बिगो बमोजिम तेईस लाख अण्ठानब्बे हजार नौ सय उनान्सय रुपैँया जरिवाना र ८ दिन कैद सजाय हुने तथा क्षतिपुर्ती शुल्क बापत पञ्चानब्बे हजार नौ सय उनान्साठी राजभण्डारीबाट भराउने फैसला भएको थियो ।

मकवानपुर, हेटौंडा उपमहानगरपालिका वडा नं. २ घर भई काठमाण्डौ कलंकी बस्दै आएका राजघण्डारीले इचंगुनारायणमा माया लक्ष्मी ट्राभल्स एण्ड टुर्स सञ्चालन गर्दै आएको खुलेको वडा प्रहरी कार्यालय बगरका प्रमुख इन्स्पेक्टर बोधराज रेग्मीले जानकारी दिए ।

बुधबार पोखरा १ बगर, टुंडिखेल मैदानमा फेला पारी तत्काल पक्राउ गरी कैद, जरिवाना तथा क्षतिपुर्ती भुक्तानीका लागि काठमाण्डौ जिल्ला अदालतमा पठाइएको उनले जनाए ।