नेकपा एमाले र अध्यक्ष केपी शर्मा ओली मध्यपहाडी लोकमार्ग हुँदै झुलाघाट-चिवाभञ्ज्याङ यात्रामा छन् । यात्राकै क्रममा विद्यार्थीले `केपी बा´ भन्दै नारा लगाएको, माओवादी केन्द्रका उपमहासचिव जनार्दन शर्माले स्वागत गरेको भिडियो र तस्वीर भाइरल छन् ।

पर्वतबाट पोखरा आउने क्रममा बिहीबार अध्यक्ष केपी शर्मा ओली बेहुलाबेहुलीलाई आशीर्वाद दिन विवाह घरमा पसे । कास्कीको अन्नपूर्ण गाउँपालिका-५ नयाँपुलका सञ्जय केसी र संगीता केसीलाई सडकछेउको घरमा पसेर उनले वैवाहिक जीवनको शुभकामनासहित आशीर्वाद दिएका हुन् ।

उनले बेहुलाबेहुलीलाई माला लगाइदिएका थिए । बेहुलाबेहुलीको परिवार एमालेनिकट रहेको बताइएको छ । नयाँपुल कास्की र पर्वतको सीमाना हो ।

ओली पर्वतको कार्यक्रम सकेर पोखरा आउने क्रममा नयाँपुलमा नेता-कार्यकर्ता स्वागत गर्न बसेका थिए । स्वागतद्वार आडैमा विवाह भइरहेपछि नेकपा एमालेका प्रतिनिधिसभा सदस्य दामोदर बैरागीले ओलीलाई उक्त घरसम्म पुर्‍याएका हुन् । बैरागी यही कास्की-३ बाट निर्वाचित सांसद हुन् ।