पोखरा । आन्तरिक राजश्व कार्यालय पोखराका प्रमुख कर अधिकृत शिव शर्माले अर्थतन्त्र सिथिल हुँदा त्यसको प्रभाव राजश्व संकलनमा देखिएको बताएका छन् । यद्यपि,आन्तरिक राजश्व कार्यालय पोखरा भने लक्ष्य अनुसारको कर संकलनमा सफल भएको उनको भनाइ छ ।

आन्तरिक राजश्व कार्यालय पोखराको लागि चालु आर्थिक वर्ष २०८०/०८१ मा ७ अर्ब राजश्व संकलनको लक्ष्य निर्धारण गरिएकोमा कात्तिक मसान्तसम्म १ अर्ब ३७ करोड ८९ लाख रुपैयाँ संकलन भएको उनले जानकारी दिए ।

राष्ट्रिय कर दिवसको अवसरमा पोखरा उद्योग वाणिज्य संघ तथा आन्तरिक राजश्व कार्यालयद्वारा आयोजित अन्तरक्रिया कार्यक्रममा बोल्दै उनले हुण्डीको अवैध कारोबारका कारण न्यूनबिजीकरणमार्फत् सामानहरु आयात हुने गरेको पनि औंल्याए । स्वच्छ, पारदर्शीर प्रविधिमैत्री कर प्रशासनः सामाजिक न्याय, आर्थिक समृद्धि र सुशासन भन्ने नाराका साथ आन्तरिक राजश्व कार्यालयले सप्ताहव्यापी कर सप्ताह मनाइरहेको छ ।

कार्यक्रममा बोल्दै पोखरा उद्योग वाणिज्य संघका अध्यक्ष पवनकुमार प्रजापतिले संघका पूर्वअध्यक्ष आनन्दराज मुल्मी नेपाल उद्योग वाणिज्य महासंघको अध्यक्ष हुँदा मूल्य अभिवृद्धि कर ( भ्याट) कार्यान्वयनमा आएको स्मरण गर्दै व्यवसायीहरु प्रगतिशील र प्रविधिमैत्री कर प्रशासनको पक्षमा रहेको बताए ।

करसम्बन्धी कार्यपत्र पेश गर्दै आन्तरिक राजश्व कार्यालय पोखराका सूचना अधिकृत गोपाल गिरीले मिसम्याच,कर र विवरण दाखिलाको तौरतरिका,छुटका व्यवस्थाबारे जानकारी गराएका थिए

कार्यक्रममा बोल्दै पोउवा संघका वरिष्ठ उपाध्यक्ष गोकर्ण कार्कीेले करदातालाई दुःख दिने हैन कि सम्मान गर्नुपर्ने धारणा राखे । करदाताको पनि सामाजिक सुरक्षाको ग्यारेण्टी हुनुपर्ने उनको माग थियो ।

संघका महासचिव बलराम आचार्यले कर नीतिहरु बनाउँदा व्यवसायीहरुको सुझाव सुनिनुपर्नेमा जोड दिए ।

कार्यक्रममा संघका कार्यसमिति सदस्यहरु बालकृष्ण कोइराला, भरत केसी,लेखनाथ सुवेदी, टीकाराम सुवेदी,युवकबहादुर बस्नेत,राम कँडेल,माधव बस्ताकोटी,व्यवसायीहरु महेन्द्र पौडेल,परशुराम तिवारीलगायतले कर प्रशासनसँग सम्बन्धित विभिन्न जिज्ञासाहरु राखेका थिए ।