पोखरा । कास्कीका प्रतिनिधिसभा सांसद मनबहादुर गुरुङ सम्मानित भएका छन् । राष्ट्रिय प्रकृति संरक्षण कोषको ४१ औँ वार्षिकोत्सवको अवसरमा संरक्षक संरक्षण पुरस्कारबाट गुरुङ पुरस्कृत भएका हुन् । अन्नपूर्ण संरक्षण क्षेत्र आयोजना स्थापनादेखि विस्तारमा उनले उल्लेख्य भूमिका खेलेका थिए ।

गुरुङलाई १ लाख २५ हजार राशिको पुरस्कार वितरण गरिएको हो । २०५४ सालमा पार्चे गाविसको अध्यक्ष हुँदा उनी संरक्षण क्षेत्र व्यवस्थापन समितिको पदेन सदस्य भएर काम गरे । माओवादी जनयुद्धमा समिति गाउँबाट विस्थापित भयो । पुनः स्थापनापछि निरन्तर उनी नै अध्यक्ष भएर काम गरेका थिए ।

सोही समयमा मूल्याङ्कन तथा अनुगमन समितिको अध्यक्ष भएर पनि काम गरे । यसले सिक्लेस इलाकाको ७ गाविस समेट्थ्यो । सन् २०१४ मा समितिले राम्रो काम गरेका कारण उनले नेतृत्व गरेको समितिले युनएनडीपीको पुरस्कार समेत जितेको थियो । निरन्तर संरक्षणमा लागिरहेका गुरुङलाई पहिलो पटक व्यक्तिगत पुरस्कार दिइएको हो ।