निर्वाचित नेतृत्वलाई बधाई

‘एमालेविरुद्ध प्रचण्ड–माधवको समाजवादी मोर्चाको औचित्य छैन’ : पृथ्वीसुब्बा

अधिवेशनको समाप्तिसँगै अब प्रतिस्पर्धाको प्रक्रिया सकिएर पार्टीमा उन्नतस्तरको एकता शुरु

गण्डक न्यूज शुक्रबार, १९ असाेज २०८०

१९ असाेज २०८०

पोखरा । नेकपा एमालेका उपमहासचिव पृथ्वीसुब्बा गुरुङले प्रचण्ड–माधव समूहले एमालेविरुद्ध बनाएको समाजवादी मोर्चाको औचित्य नरहेको बताएका छन् ।

गण्डकी प्रदेश कमिटिका निर्वाचित नेतृत्वलाई बधाई तथा शुभकामना दिन आयोजित कार्यक्रममा उपमहासचिव गुरुङले एमालेविरुद्ध बनाइएको कथित समाजवादी मोर्चाको औचित्य नरहेको बताएका हुन् ।

नवनिर्वाचित नेतृत्वले एमाले विरोधी मोर्चाको औचित्य छैन भनेर तलसम्म सन्देश लैजानुपर्ने बताए । ‘समाजवादी मोर्चाको नाममा बामपन्थीहरु मिलेर बनाएको भनिएको मोर्चा सम्पूर्ण रुपमा एमाले विरुद्ध परिचालित छ । हामीले एमाले भन्दा अर्को लोकतान्त्रिक र बामपन्थी पार्टी छैन र त्यो भन्दा बाहिर रहेर हुँदैन भन्ने प्रमाणित गर्नुपर्नेछ ।’ – गुरुङले भने ।

उनले अधिवेशनको समाप्तिसँगै अब प्रतिस्पर्धाको प्रक्रिया सकिएर पार्टीमा उन्नतस्तरको एकता शुरु भएको दाबी समेत गरे । चुनाव भएपछि पाटी फुटिहाल्छ र सर्वसम्मत गरेपछि पार्टी निरंकुश हुन्छ भन्ने दुवै कुरा गलत रहेको उनको भनाई छ ।

परिस्थिति अनुसार चुनावी प्रक्रिया र सर्बसम्मत सबैको महत्व रहने उनले धारण राखे । गुरुङले भने– ‘हाम्रो पार्टीभित्र दुई खाले गलत धारणा छन् । चुनावले पार्टी फुट्छ भन्ने एउटा गलत धारणा र मनोनयनले वा सर्वसम्मतिले नेतृत्व निरंकुश हुन्छ भन्ने दुवै सोच गलत हुन् । एमाले उन्नत लोकतान्त्रिक अभ्यास गर्ने पार्टी हो,अब चुनावबाट नयाँ नेतृत्व चयनसँगै हामी एकजुट भइसकेका छौ । हमेशा चुनाव र हमेशा सर्वसम्मत दुवै ठिक होइनन् ।’

तस्वीरः राधिका कँडेल

एमाले सधै लोकप्रिय हुनुको कारण यसमा रहेको आन्तरिक लोकतन्त्र नै प्रधान रहेको उनले बताए । एमालेसंग लोकतान्त्रिक प्रक्रियाका विषयमा अरु पार्टीको तुलना हुनै नसक्ने उनको भनाई छ ।

मिसन ०८४ लाई मध्यनजर गरेर पार्टीको आन्तरिक जीवनलाई मजबुद्ध बनाउने चुनौती एमालेमा रहेको धारणा राख्दै उनले एमाले कमजोर रहँदा स्वाधिनताको आन्दोलन र समृद्धिको अभियान अलपत्र पर्ने बताए ।