काठमाडौं। अमेरिका पठाइदिने भन्दै विभिन्न प्रलोभनमा पारी मानब वेचविखन गर्ने गिरोहका नाइकेलाई प्रहरीले पक्राउ गरेको छ।

रूकुम पूर्व सिस्ने गाउँपालिका-४ नाथीगाड जन्मस्थान भई हाल अमेरिकाको टेक्सासमा बसोबास गर्दै आएका अमेरिकी नागरिक ५२ वर्षीय मृदुल भन्ने हस्त गौतमलाई प्रहरीले बुधबार रूपन्देहीको बेलहियाबाट पक्राउ गरेको हो ।

गौतमले नेपाली नागरिकहरुलाई युएई, थाइल्याण्ड, फिलीपिन्स, हङकङ लगायतका देशहरूमा पुर्‍याई राहदानी, मोबाइल समेत जफत गरी थप पैसा माग गर्ने तथा एजेन्टले भनेजति पैसा नदिएमा शारीरिक मानसिक यातना दिनुका साथै विदेशमा रहेका एजेन्टहरूलाई वेचविखन गर्ने जस्ता कार्य गरी अलपत्र पार्ने गरेको प्रहरी अनुसन्धानमा खुल्न आएको छ।

गौतम यसअघि पनि मानब वेचविखन तथा ओसारपसार र संगठित अपराधका प्रमुख योजनाकार रहेको खुल्न आएको र पीडितहरूबाट २ करोड भन्दा बढी पैसा लिइसकेको खुल्न आएको छ ।

पक्राउ परेका उनीमाथि जिल्ला अदालतबाट ७ दिन म्याद थपको अनुमति लिएर मानव वेचविखन, ओसारपसार तथा संगठित अपराध मुद्दामा थप अनुसन्धान भइरहेको प्रहरीको भनाई छ ।