बाँकेको शमशेरगन्जस्थित जंगलमा रोकिराखेको ट्रकसँग बस ठोक्किँदा मृत्यु हुनेको संख्या ७ पुगेको छ । दुर्घटनामा १३ जना सख्त घाइते भएका छन् । ४ जनाकाे घटनास्थलमै ज्यान गएकाे थियाे ।

बर्दियाको ठाकुरद्वारा बेतनी सामुदायिक वन उपभोक्ता समितिका सदस्यहरू दुर्घटनामा परेका हुन् । उनीहरू बस रिजर्भ गरेर दाङको थारु संग्रहालय भ्रमण गरी फर्किने क्रममा राप्ति सोनारी गाउँपालिका-८ को जंगल क्षेत्रमा राति सवा ९ बजेतिर दुर्घटनामा परेकाे कोहलपुरका डीएसपी सुन्दर तिवारीले गण्डकन्यूजलाई जानकारी दिए ।

उनका अनुसार दुर्घटनामा चालक अन्दाजी ४५ वर्षीय जोगेन्द्र चन्द शाही, अन्दाजी ६५ वर्षीय चानुराम थारु, काशीराम थारु, कस्तुरी थापा, रुपा परियार, जयन्ती थारु र सहचालकको मृत्यु भएको हो । सहचालकको नाम खुलेको छैन । अन्य घाइतेकाे उपचार भइरहेकाे डीएसपी तिवारीले जनाए ।

बिग्रिएर मर्मतका लागि रोकिराखेको ना ८ ख ६४०५ नम्बरको ट्रकमा तीब्र गतिमा हुँइकिरहेकाे ना ७ ख २३२१ नम्बरको बस ठाेक्किन पुग्दा बस र बसमा सवार हुनेहरूमा क्षति पुगेकाे हाे ।