पोखराबाट काठमाडौं उड्न लागेको यती एयरलाइन्सको जहाजमा मुसा देखिएको छ । रनवेको घाँसबाट मुसा दौडिएर आएर टायरतर्फ पसेको विमानस्थलको अनुमान छ ।

यतीको एटीआर–७२ जहाज बिहान ११ बजेर ५० मिनेटमा उड्ने तयारी गरिरहेको बेला मुसा प्लेनतर्फ आएको हो । पोखरा अन्तर्राष्ट्रिय विमानस्थलकी निमित्त प्रमुख जशोदा रेग्मीका अनुसार यात्रुहरु चढिरहेका बेला मुसा देखिएपछि चढिसकेका यात्रुलाई झारेर मुसा खोज्ने काम भइरहेको छ ।

यात्रु धमाधम जहाज चढिरहेका थिए। त्यही बेला जहाजमा मुसा पसेको देखिएपछि चढिसकेका सबै झारिएको थियो । श्रोतका अनुसार जहाजमा यात्रु चढिरहेका बेला मुसा देखिएको थियो। घाँसे मैदानबाट करिब २० मिटर पर जहाज रोकिएको थियो। त्यही घाँसे मैदानबाट मुसा आएको हुनसक्ने श्रोतले बतायो।

‘जहाजको पांग्रातिर मुसा देखिएकोमा भित्र पस्यो वा बाहिर गयो भन्ने यकिन नभएकाले खोजी सुरु गरिएको हो । यतीका प्राविधिक आएर धमाधम मुसा खोज्ने काम भएको र यतीको अर्को जहाज आएर यात्रुलाई काठमाडौं लगिएको बताइन्छ ।