पोखराकी वरिष्ठ साैन्दर्यकर्मी चिनु गुरुङ उत्कृष्ट महिला उद्यमी पुरस्कारबाट पुरस्कृत भएकी छन् । गुरुङलाई गण्डकी प्रदेशवाट महिला उद्यमशितलामा अतुलनिय योगदान पुर्‍याएको भन्दै नेपाल सरकारले सम्मान गरेको हाे ।

महिला बालबालिका तथा ज्येष्ठ नागरिक मन्त्रालयले ‘पाचौँ राष्ट्रिय महिला अधिकार दिवस’को अवसरमा उनलाई राष्ट्रपति महिला उत्थान कार्यक्रम अन्तर्गत सम्मान गरिएको हो ।

महिला बालबालिका तथा ज्येष्ठ नागरिक मन्त्रालयले सातै प्रदेशका अगुवा महिला उद्यमीलाई काठ्माण्डौमा पुरस्कृत गरेको थियो । रोजगारी सृजना, स्वरोजगार अभियान्ता, महिला उद्यमशिलता र आर्थिक समृद्धिमा अतुलनिय योगदान पुर्‍याएको भन्दै सम्मान गरेको हो । पुरस्कारको राशी नगद १ लाख रुपैयाँ रहेको छ ।

महिलाहरु पनि आत्मनिर्भर हुनु पर्छ भन्दै २०५२ सालदेखि सौन्दर्यकर्मको संघर्षमा निस्केकी चिनुले आजका मितिसम्ममा तीन हजार भन्दा बढी गृहिणी तथा युवायुवतीहरुलाई आवश्यकता अनुसार निःशुल्क र सशुल्क तालिम दिइसकेकी छन् । सौन्दर्यको बजारमा एक हजार भन्दा बढी त अहिले उनैको तालिम मार्फत् प्रेरणा पाएर स्वरोजगार भएका छन् । जसमा ७ हजार भन्दा बढीले स्वदेश तथा बिदेशमा रोजगार पाएका छन् ।

सुरुवाती अवस्थामा पोखराको पृथ्वीचोकवाट व्यवसाय संचालन गरेकी चिनुले हाल गुरुङ्ग व्युटिपार्लर एण्ड एकेडेमी प्रालिको रुपमा पोखराकै न्यूरोडमा मुख्य कार्यालय बनाएर संचालन गरेकी छन् भने पोखरा भित्र र प्रदेशका अन्य जिल्लाहरुमा पनि शाखा विस्तार गरी सेवा दिने र तालिम प्रदान गर्ने काम गरेकी छन् ।

उनी नेपाल घरेलु तथा साना उद्योग महासंघ गण्डकी प्रदेशको अध्यक्ष (महिला) का रुपमा रहेकी छन् भने थुप्रै सामाजिक संघसंस्थामा रहेर समाजसेवामा पनि आवद्ध छन् ।

सम्मानपछि वोल्दै गुरुङ्गले भनिन्–“सौन्दर्य व्यवसायलाई पुस्तान्तरित व्यवसायका रुपमा विकास गरिनुपर्छ । महिलाहरु अब सधैँ माग्ने मात्रै होईन, दिने हैसियतमा आफूलाई विकास गर्नुपर्छ ।” नेपाली वस्तुको उत्पादन गरी आयात प्रतिस्थापन गर्ने अभियानमा रहेकी चिनु स्वरोजगारलाई देश समृद्धिको आधार मान्ने गरेकी छन् ।