काठमाडौं। वैदेशिक रोजगारीका लागि दुबई पठाइदिन्छु भन्दै रकम ठगी गरेको अभियोगमा प्रहरीले एक जनालाई पक्राउ गरेको छ।

काभ्रेपलाञ्चोक जिल्ला चौँरीदेउराली गाउँपालिका-६ कात्तिके देउराली घर भई हाल काठमाडौं बुढानिलकण्ठ नगरपालिका -१० कपन आकाशेधारा बस्दै आएका २९ वर्षीय उमेश रिमाललाई प्रहरीले ठगी गरेको आरोपमा आइतबार दिउँसो पक्राउ गरेको हो ।

रिमाल समेतले १७ जना पीडितलाई वैदेशिक रोजगारका लागि दुबईमा कुखुरा फर्ममा काम लगाइदिने र मासिक ५० हजार रूपैयाँ तलब हुन्छ भन्दै प्रलोभनमा पारी पीडितहरूबाट पटक-पटक गरी ९ लाख ५० हजार रूपैयाँ रकम ठगी गरेको अभियोग छ।

उनलाई पक्राउ गरी उपस्थित गराउन वैदेशिक रोजगार विभागबाट पत्राचार भएपछि काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले काठमाडौं महानगरपालिका-३१ नयाँबानेश्वरबाट पक्राउ गरेको हो ।

उनीमाथि थप अनुसन्धान तथा कारवाहीका लागि वैदेशिक रोजगार विभाग बुद्धनगर काठमाडौं पठाइएको प्रहरीको भनाई छ ।