छतबाट खसेर घाइते भएका नेकपा (एकीकृत समाजवादी) का केन्द्रीय सदस्य सरोजकुमार उपाध्यायको उपचारका क्रममा निधन भएको छ।

उनी शनिबार दिउसो दिउँसो २ बजेतिर शंखमुलस्थित एक कफी सपको छतबाट खसेर घाइते भएका थिए। छतबाट खसेका उनी बिजुलीको तारमा अल्झिएका थिए। प्रत्यक्षदर्शीका अनुसार त्यसपछि भूईमा पछारिएका थिए।

उनलाई तत्काली नयाँ बानेश्वरस्थित निजामति कर्मचारी अस्पताल लगिएको थियो। त्यहाँ उपचार हुन नसकेपछि माइतिघरस्थित अन्नपूर्ण न्यूरो अस्पतालमा लगिएको थियो। उनको उपचारका क्रममा निधन भएको अस्पतालले जनाएको छ।

नेता उपाध्याय पूर्व प्रधानमन्त्री एवं एकीकृत समाजवादीका अध्यक्ष माधवकुमार नेपालका भाइ हुन्। ६२ वर्षीय उपाध्याय इन्जिनियर हुन्। पछिल्लो समय एकीकृत समाजवादीमा संलग्न थिए।

प्रहरीका अनुसार उनी रूफटपमा एक्लै बसेका थिए। एक्कासी ठूलो आवाज आएपछि क्याफेका कर्मचारी तथा सञ्चालकले हेर्दा उनी खसेको देखेका थिए। उनी पछिल्लो तीन दिनदेखि उक्त क्‍याफे पुगेका थिए।