काठमाण्डाै। काठमाण्डौको नयाँ बसपार्कबाहिरको सडकमा यातायात मजदुरले विरोध प्रदर्शन गरेका छन् । मजदुरले सडकमै गाडी तेर्साएर प्रदर्शन गर्दा नयाँ बसपार्क, बालाजु, गोगङ्बु, माछापोखरीलगायत क्षेत्रको यातायात अस्तव्यस्त बनेको छ।

आन्दोलित यातायात मजदुर प्रहरीको भ्यान जलाएका छन्। उनीहरूले प्रहरीको दुई वटा भ्यान जलाएको प्रहरीले जनाएको छ।

यातायात मजदुरहरुले आफूहरुलाई नयाँ बसपार्कको ठेकेदार कम्पनीका प्रतिनिधिहरुले कुटपिट पनि गरेको बताएका छन् । उनीहरुले एक विज्ञप्ति जारी गर्दै माग पूरा नभएसम्म भोलिदेखि उपत्यकाका सम्पूर्ण सवारीसाधन बन्द गर्ने जनाएका छन् । नेपाल यातायात स्वतन्त्र मजदुर संगठन, नेपाल यातायात मजदुर संघ र अखिल नेपाल यातायात मजदुर संघका अध्यक्षले विज्ञप्ति जारी गर्दै यस्तो चेतावनी दिएका हुन् ।

ट्राफिक नियम मिच्दा तिर्नुपर्ने जरिवाना रकम बढाएको, पाँच पटकभन्दा धेरै गल्ती गर्दा लाइसेन्स खारेजी हुने नयाँ नियमलगायतको विरोधमा मजदुरले आन्दोलन गरेका हुन्।।

नयाँ व्यवस्थाअनुसार ट्राफिक नियम मिच्दा पाँच सयदेखि १५ सय रुपैँयाँसम्म जरिवाना हुँदै आएको छ ।