काठमाडौं । नवनियुक्त संघीय प्रतिनिधिसभाका सभामुख देवराज घिमिरेले पद तथा गोपनीयताको सपथ लिएका छन्। शुक्रबार राष्ट्रपति कार्यालयमा आयोजित कार्यक्रममा सभामुख घिमिरेलाई राष्ट्रपति विद्यादेवी भण्डारीले सपथ खुवाएकी हुन्।

सपथपछि सभामुख घिमिरेले लैनचौरस्थित सहिदको शालिकमा माल्यार्पण गर्ने कार्यक्रम तय भएको छ। त्यसपछि सभामुख घिमिरेले सिंहदरबारस्थित सभामुखको कार्यकक्षमा पुगेर पद वहाली गर्ने कार्यक्रम रहेको संसद् सचिवालयले जनाएको छ।

यसैबीच, घिमिरेले नेकपा एमालेको पार्टी सदस्यता त्यागेको घोषणा गरेका छन्।

बिहीबार सत्ता गठबन्धनकातर्फबाट सभामुखमा निर्वाचित भएका घिमिरेले आज विज्ञप्ति जारी गर्दै आफै एमालेको सदस्यता त्यागेको जानकारी गराएका हुन् । यससँगै उनी एमालेको सबै जिम्मेवारीबाट अगल भएका छन् ।

घिमिरे नेकपा एमालेकातर्फबाट झापा–२ बाट प्रतिनिधि सभामा निर्वाचित भएका थिए ।