पोखरा । पोखरा महानगरपालिकाले अब वडा नम्बर ३२ स्थित लामेआहालमा फोहोर व्यवस्थापन गर्ने भएको छ।

शुक्रबार पोखरा महानगरपालिका कार्यपालिकाको बैठकले नगर क्षेत्रबाट संकलित फोहोर अल्पकालीन रूपमा वडा ३२ स्थित रहेको लामेआहालमा अल्पकालिन फोहोर व्यवस्थापन गर्ने निर्णय गरेको हो।

यसअघि पोखरा अन्तर्राष्ट्रिय विमानस्थलनजिक पोखरा–१४ बाच्छेबुडुवास्थित ल्यान्डफिल साइटमा फोहोर व्यवस्थापन गर्दै आएको थियो। तर अंग्रेजी नयाँ वर्ष (जनवरी १) बाट विमानस्थल सञ्चालन गर्न लागिएपछि महानगरले तत्कालका लागि लामेआहालमा फोहोर व्यवस्थापन गर्ने निर्णय गरेको हो।

फोहोर व्यवस्थापनका लागि जग्गा खोज्न पोखरा–३३ का वडाध्यक्ष रामचन्द्र अधिकारीको संयोजकत्वमा समिति बनाइएको थियो। समितिले २१, २२ र ३३ वडामा प्रशोधन केन्द्र बनाउने गरि अध्यान गरेको थियो।

महानगरले फोहोर फाल्ने भनिएको उक्त ठाउँमा पहिरोले कटान गरेको ठूला खाल्डो छ। स्थानीयले पनि उक्त खाल्डो पुरिने हुँदा फाहोर फाल्न दिन सहमति जनाएका छन्। यसरी दोहोरो फाइदा हुने हुँदा महानगरले उक्त ठाउँमा फोहोर फाल्ने निर्णय गरेको हो।