काठमाडौं । नेकपा एमालेका प्रदेशसभा सदस्य उम्मेदवार दिपक निरौलालाई प्रहरीले नियन्त्रणमा लिएको छ ।

काठमाडौं– ५ प्रदेश क्षेत्र २ का उम्मेदवार निरौलामाथि मतदातालाई प्रभावित पार्न पैसा बाँड्न गएको आरोप छ ।

गएराति निरौला र एमाले नगर कमिटी अध्यक्ष प्रदीप डंगोल बूढानीलकण्ठ– ६ स्थित एक घरमा पुगेका बेला पैसा बाँड्न गएको भन्दै स्थानीयबासीले होहल्ला गरेपछि प्रहरी टोली पुगेको थियो ।

स्थानीयले घेरा हालेपछि उद्धार गरी सुरक्षामा राखेको प्रहरीले बताएको छ ।

स्थानीय बासिन्दाले पैसा बाँडेको आरोप लगाए पनि पैसा बरामद नभएको प्रहरीले जनाएको छ ।

एमाले उम्मेदवार निरौलाले भने क्यान्सर रोगबाट पीडित पार्टीका शुभेच्छुक तोक्तान लामाको स्वास्थ्य अवस्थाबारे जानकारी लिन गएको बताएका छन् । साथै उनले पैसा बाँड्न गएको आरोप प्रमाणित गर्न चुनौती दिएका छन् ।

एमालेको काठमाडौं ५ निर्वाचन परिचालन कमिटीले पनि विज्ञप्ति निकालेर पैसा बाँडेको भनेर बद्नाम गर्न खोजेको भन्दै आपत्ति जनाएको छ ।