पोखरा वडा नं. ८ नयाँबजारस्थित एक पेट्रोल पम्प जोडिएको घरमा अकस्मात लागेको आगो समयमै नियन्त्रणमा लिँदा ठूलो क्षति हुनबाट टरेको छ ।

वृहस्पति आयल स्टोर्स जोडिएको घरमा आज दिउँसो ४ बजे अचानक आगो लागेको हो । घरधनी नभएका बेला छतमा राखिएको वासिङ मेसिनमा विद्युत सर्ट भएर आगो दनदनी बलेपछि छिमेकीले धुँवाको मुस्लो देखेका थिए ।

घरमा तालाबन्दी देखेपछि अर्को घरको छतबाट गएर स्थानीयले आगो निभाएका थिए । पेट्रोल पम्पमै रहेको फायर एक्स्टिन्गुइसरको मद्धतले आगो निभाइएको थियो ।

आगलागीबाट वासिङमेसिन सहित स्टोरमा रहेका पूराना कपडाहरू, ३ बोरा धान जलेर नष्ट भएको प्रहरीले जानकारी दिएको छ ।

घटना लगत्तै दमकल पनि आएको थियो । त्यसैबेला नेपाल आयल निगमबाट पेट्रोल लिएर आएको ट्यांकरलाई घटनास्थलबाट टाढा हटाइएको थियो ।

इन्धन भण्डारण नजिकै घरधनी समेत नभएको अवस्थामा छतमाथि दनदनी आगो बलेपछि स्थानीय निकै त्रसित भएका थिए । बेलैमै आगो लागेको थाहा भएका कारण नियन्त्रणमा लिन सक्दा थप क्षति हुन पाएन ।