पोखरा । लोकप्रिय इलेक्ट्रिक टु –ह्विलर एथरको नयाँ स्कुटर पोखरा बजारमा आएको छ । इलेक्ट्रीक स्टार्टअप कम्पनी एथर इनर्जीले सन् २०२५ मा सार्वजनिक गरेको नयाँ स्कुटर पोखरामा विक्रीवितरण सुरू भएको हो ।

कम्पनीले बजारमा एथर ४५० स्कुटरको एक्स र एस दुवै मोडलमा अपडेटेड भर्सन सार्वजनिक गरेको छ । यी स्कुटरमा नयाँ फिचर थप गरेको छ । यसको मल्टी मोड ट्रयाक्सन कन्ट्रोल फिचरका साथै रेन्जमा समेत सुधार गरिएको कम्पनीले जनाएको छ । साथै, एथर स्ट्याक ६ सफ्टवेयर सुविधा पनि थपिएको छ ।

एथरका लागि पोखरा क्षेत्रको आधिकारिक बिक्रेता अटोवेज प्रालि रहेको छ । पोखरा नयाँबजार स्थित आफ्नै भवनमा ‘एथर एक्सपिरियन्स सेन्टर’ रहेको छ र यहाँबाटै एथरको स्कुटर विक्री हुने गर्दछ ।

डाइरेक्टर सन्ध्या पौडेलका अनुसार पोखरामा पहिलो डिलरसंगै सर्भिस स्टेशन पनि व्यविस्थत छ । अटोवेज भवन र लेकसाइडमा चार्जिङ स्टेशन पहिले नै स्थापना भएको हो ।

के छ सुविधा ? 

कम्पनीका अनुसार एथर स्कुटर किन्न चाहनेलाई सबैभन्दा खुशीको कुरा नयाँ नयाँ फिचर थप भएको छ भने मूल्य चाहिँ ४० हजार सम्म घटेको छ ।

नेपाली बजारमा नयाँ एथर ४५० एक्स ३.७ किलोवाट भेरियन्टको ४ लाख ३९ हजार ९ सय ९९ पर्नेमा घटाएर ३ लाख ९९ हजार ९ सय ९९ कायम गरिएको छ ।

यस्तै, २.९ किलोवाट भेरियन्टको मूल्य ३ लाख ६४ हजार ९ सय ९९ कायम भएको छ । पहिले ३ लाख ९९ हजार ९ सय ९९ रहेको थियो । एथर ४५० एस २.९ किलोवाट भेरियन्टको मूल्य ३ लाख ४९ हजार ९ सय ९९ बाट घटेर ३ लाख २४ हजार ९ सय ९९ तोकिएको छ ।

२०२५ भेरियन्ट ४५० एक्स स्कुटरको रेन्ज अब २.९ किलोवाट भेरियन्टको १०५ किलोमिटर र ३.७ किलोवाट भेरियन्टको रेन्ज १३० किलोमिटर पाउन सकिन्छ । यस स्कुटरको टप स्पीड भने ९० किलोमिटर प्रतिघण्टा रहेको छ ।

पुरानो मोडल एथर ४५० एक्स स्कुटरको २.९ किलोवाट भेरियन्टको रेन्ज ८५ किलोमिटर र ३.७ किलोवाट भेरियन्टको रेन्ज १०५ किलोमिटर रहेको थियो ।

नयाँ ४५० एक्समा राम्रो ग्रिपिङका लागि एमआरएफको टायर दिइएको छ । यसमा नयाँ फिचरको रुपमा म्याजिक ट्वीस्ट सुरक्षा फिचर दिइएको छ । म्याजिक ट्वीस्ट एउटा विशेष प्रकारको ब्रेकिङ सुविधा हो । जसले स्कुटर थ्रोटल उल्टो घुमाउँदा ब्रेक लिबर नसमाते पनि स्कुटर रोक्ने काम गर्छ ।

३.७ किलोवाट आवर मोडेलको स्कुटर शून्यबाट १०० प्रतिशतसम्म चार्ज गर्न ५ घण्टा ४५ मिनेट र २.९ किलोवाट भर्सनलाई साढे चार घण्टा लाग्ने बताइएको छ । होम चार्जिङले सहज हुने एथर पोखराका प्रोडक्ट स्पेशियलिस्ट एरिक्शन थापाले बताए ।

एथर इलेक्ट्रिक स्कुटरमा अन्यभन्दा अनौठो फिचर समावेश भएकाले सबैभन्दा गज्जब छ । अटोहोल्ड फिचरले चालकलाई लड्नबाट जोगाउँछ । यति मात्र होइन एथर स्कुटरका लागि छुट्टै मोबाइल एप समेत छ ।

एथर स्कुटरमा गुगल म्याप, मल्टी-स्टप ट्रिप प्लानर, ब्लुटुथ कल तथा म्युजिक कन्ट्रोल, थेफ्ट एण्ड टो अलर्ट्स लगायतका फिचर रहेका छन् । फाइन्ड माई स्कुटर, फाइन्ड एथर ग्रिड नियर यु, रियल टाइम चार्ज स्टाटस, पुस नेभिगेसन, राइड इनसाइट, एथर ट्रिप प्लानर आदि थप फिचर समावेश छन् ।

एथरका ग्राहकले स्कुटर किनेपछि पूर्ण सन्तुष्ट रहेको प्रतिक्रिया दिने गरेको एरिया सेल्स मेनेजर सुरेश जिसी बताउँछन् ।

अटोवेज प्रालिले टोयोटाको डिलरको रूपमा पनि विगत २० वर्ष भन्दा अगाडिदेखि पोखरामा सेवा दिइरहेको छ ।

सम्बन्धित समाचारः

पोखरामा आयो भारतमा सर्वाधिक लोकप्रिय ‘एथर’ इलेक्ट्रीक स्कुटर [फोटो/भिडियो]