झापा । झापामा एक व्यक्तिले पूर्व पतिसँग बोलेको निहुँमा श्रीमतीको हत्या गरेका छन् ।

कनकाई नगरपालिका– ५ नारायणदल चोकमा बस्ने ४० बर्षीया मनिषा लिम्बु मग्रान्तीको हत्या भएको हो।

ताप्लेजुङ सिनाम घर भई नारायणदल चोकस्थित योगेन्द्र बस्यालको घरमा केहि महिनादेखि भाडामा बस्दै आएका ३९ बर्षीय लालबहादुर सार्कीले सोमबार राति श्रीमती मनिषाको हत्या गरी आत्महत्याको प्रयास गरेका छन् ।

लालबहादुरको घाँटीमा गम्भीर चोट लागेको र उपचारका लागि बिएण्डसी अस्पताल पठाइएको जिल्ला प्रहरी कार्यालय झापाले जनाएको छ । आफ्नै जातिसँग पहिलो विवाह गरेकी मनिषाले पूर्व श्रीमानसँग बोलेको निहुँमा लालबहादुरले खुकुरी प्रहार गर्दा मनिषाको मृत्यु भएको पाइएको प्रहरीले जनाएको छ ।

पारिवारिक स्रोतका अनुसार मनिषाको मृत्यु भएपछि लालबहादुरले आत्महत्या प्रयास गरेका हुन् । लालबहादुरको समेत जेठी श्रीमतीसहित परिवार पहाडमा रहेको बुझिएको छ ।

घटना बारे थप अनुसन्धान भइरहेको प्रहरीले जनाएको छ ।