पोखरा । पोखरामा आगामी शनिबार देखि अन्तर्राष्ट्रिय नाटक महोत्सव– २०८१ हुने भएको छ ।

पोखरा थिएटरको आयोजनामा हुने यो महोत्सव यहि चैत ९ गते शनिबार देखि पाँच दिनसम्म चल्नेछ ।

पोखरालाई अन्तर्राष्ट्रिय साँस्कृतिक तथा नाट्य पर्यटनको केन्द्रका रुपमा स्थापित गर्ने उद्देश्यले महोत्सवको आयोजना गरीएको महोत्सव निर्देशक परिवर्तनले जानकारी दिए ।

उनका अनुसार यस महोत्सवमा नेपालका साथै चीन, ट्युनिसिया, नर्वे र जापानका ६ वटा नाटक महोत्सवमा मञ्चन हुनेछन् ।

महोत्सवमा नाटक सँगै खुला छलफल तथा संवाद र विविध साँस्कृतिक कार्यक्रमहरु पनि रहने उनले जानकारी दिए ।

यसअघि पोखरा थिएटरले वि.सं. २०७५ मा पहिलो पटक पोखरा अन्तर्राष्ट्रिय नाटक महोत्सव आयोजना गरेको थियो । सोही परम्परालाई निरन्तरता दिँदै पुनः महोत्सव आयोजना गर्न लागेको आयोजकले जनाएको छ ।

पोखरालाई सांस्कृतिक तथा पर्यटन गन्तव्यका रुपमा अन्तर्राष्ट्रिय पहिचान दिलाउन यो महोत्सव महत्वपूर्ण हुने आयोजकको विश्वास छ ।

महोत्सव हेर्नको लागि दुई सय, तीन सय र पाँच सयको टिकट काट्नुपर्ने व्यवस्था रहेको छ ।