तनहुँ । तनहुँका चारवटा क्याम्पसमा भएको स्वतन्त्र विद्यार्थी युनियन (स्ववियु)को निर्वाचनमा २ वटा क्याम्पसमा अनेरास्ववियु विजयी हुँदा नेविसंघ र अखिल (क्रान्तिकारी)ले एक/एक क्याम्पसमा विजय हात पारेका छन् ।

मंगलबार सम्पन्न निर्वाचनमा भिमाद नगरपालिकास्थित जनज्योति क्याम्पसमा अनेरास्ववियुका विप्लव भण्डारी स्ववियु सभापतिमा विजयी भएका छन् । नेपाल विद्यार्थी संघ र अखिल क्रान्तिकारीको गठबन्धनलाई हराउँदै भण्डारी सभापतिमा विजयी भएका हुन् ।

क्याम्पसमा स्ववियुको नेतृत्व चयनका लागि भएको मतदानमा २५८ मतमध्ये २४४ मत खस्दा विजयी भण्डारीले १३१ मत प्राप्त गरे । उनका प्रतिस्पर्धी अमृत गैह्रेले १०९ मत प्राप्त गरे ।

यस्तै, सचिवमा अनेरास्ववियुका अस्मिता क्षेत्री १२१ मत प्राप्त गरी विजयी भइन् भने प्रतिस्पर्धी नेविसंघकी दीपा रानाले १२० मत प्राप्त गरेकी थिइन् । कोषाध्यक्षमा अनेरास्ववियुका यसुमाया थापा १३२ मत प्राप्त गरी विजयी भएकी छन् भने प्रतिस्पर्धी नेविसंघका कासिका रानाले १०७ मत प्राप्त गरेकी छन् ।

स्ववियु सदस्यहरुमा अनेरास्ववियुका सुजन पौडेल, साविया खातुन मियाँ, विष्णु उच्चै, विनिता रसाइली र ममता सिग्देल विजयी भएका छन् ।

त्यस्तै, शुक्लागण्डकी नगरपालिका–५ बेलचौतारास्थित भानुभक्त बहुमुखी क्याम्पसको स्वतन्त्र विद्यार्थी युनियनमा अनेरास्ववियु र अखिल (क्रान्तिकारी) को गठबन्धन विजयी भएको छ । मतदानबाट स्ववियु सभापतिमा अनेरास्ववियुका मिनबहादुर थापा विजयी भएका हुन् ।

अध्यक्षमा विजयी थापाले १२८ र प्रतिस्पर्धी नेपाल विद्यार्थी संघका एजिना महतले १०५ मत प्राप्त गरेको निर्वाचन समितिका संयोजक निरोज भट्टराईले जानकारी दिए ।

२६८ मतदाता रहेकामा २४१ मत खस्दा सचिवमा अखिल (क्रान्तिकारी) का विनिता भण्डारीले ११६ मत प्राप्त गरी विजयी भएकी छन् भने उनका प्रतिस्पर्धी नेविसंघका सुनिल लामिछानेले १०९ मत प्राप्त गरे ।

कोषाध्यक्षमा अनेरास्ववियुका पुष्पा खड्का १४५ मत प्राप्त गरी विजयी भए भने उनका प्रतिस्पर्धी नेविसंघका रस्मिता कार्कीले ८७ मत प्राप्त गरेकी छन् ।

निर्वाचनबाट सदस्यहरुमा अनेरास्ववियुका अविजित लम्सालले १३३, अञ्जली विकले ११६, अखिल (क्रान्तिकारी)का निराज भण्डारीले ११६, नेपाल विद्यार्थी संघका प्रतिक्षा गिरीले ११३ र नेविसंघका स्वस्तिका सिग्देलले ११२ मत प्राप्त गरी विजयी भएका छन् ।

यस्तै, विवाद र विरोधका बीच सम्पन्न भएको निर्वाचनबाट व्यास नगरपालिका–१ विज्ञानचौरस्थित आदिकवि भानुभक्त क्याम्पसको स्वतन्त्र विद्यार्थी युनियनको अध्यक्षमा नेविसंघको प्यानलै विजयी भएको छ ।

क्याम्पसको स्ववियु नेतृत्व चयनका लागि विवाद र विरोधका बीच भएको निर्वाचनबाट अध्यक्षमा अनुप आलेले ५०० मत प्राप्त गरी निर्वाचित भएका हुन् ।

१ हजार ५७७ मतदातामध्ये ५५५ जनाले मतदान गर्दा सचिवमा सागर पाण्डेले ४७१, कोषाध्यक्षमा निर्वाचित रोशन ओझाले ४७९ मत प्राप्त गरी विजयी भएका छन् ।

क्याम्पसको स्ववियु निर्वाचनमा अनेरास्ववियु, अखिल (क्रान्तिकारी), अखिल (समाजवादी) र अखिल (क्रान्तिकारी) बहुमतले भाग लिएका थिएनन् । निर्वाचन प्रक्रियामा धाँधली भएको भन्दै अनेरास्ववियुले उच्च अदालत पोखरामा रिट दर्ता गरेको छ भने अखिल (क्रान्तिकारी) सहित अन्य विद्यार्थी संगठनले विभिन्न माग राख्दै निर्वाचन समितिको कार्यालयमा तालाबन्दी गरेका थिए ।

चार विद्यार्थी संगठनको बहिष्कारका बीचमा आदिकवि भानुभक्त क्याम्पसमा भएको मतदानमा ३५ प्रतिशत मत खसेको क्याम्पस प्रमुख महाप्रसाद हड्खलेले बताए ।

यसैगरी, आँवुखैरेनी गाउँपालिकास्थित आँबुखैरेनी क्याम्पसको स्वतन्त्र विद्यार्थी युनियनको निर्वाचनमा अखिल (क्रान्तिकारी)को प्यानलै विजयी भएको छ ।

मतदानबाट स्ववियु सभापतिमा अखिल (क्रान्तिकारी) का निशान मगर ९७ मत प्राप्त गरी विजयी भएका हुन् ।

निर्वाचन अधिकृत दुर्गाबहादुर थापाका अनुसार प्रतिस्पर्धी नेपाल विद्यार्थी संघका बोनिस अधिकारीले ६४ मत प्राप्त गरेका छन् भने उम्मेदवारी फिर्ता लिए पनि अनेरास्ववियुका रक्षा पोख्रेलले सात मत प्राप्त गरेकी छन् ।

क्याम्पसको स्ववियु सचिवमा अखिल (क्रान्तिकारी) का गंगाप्रसाद लामिछाने ९२ मत प्राप्त गरी विजयी भएका छन् भने प्रतिस्पर्धी नेपाल विद्यार्थी संघका किस्ता श्रेष्ठले ६२ र अनेरास्ववियुका मोनिका खत्रीले १२ मत प्राप्त गरेका छन् ।

कोषाध्यक्षमा अखिल (क्रान्तिकारी)का करुणा गुरुङ ९० मत प्राप्त गरी विजयी भएकी छन् भने प्रतिस्पर्धी नेपाल विद्यार्थी संघका अविनास थापाले ५६ र अनेरास्ववियुका आशिष अधिकारीले १८ मत प्राप्त गरेका छन् । २०५ मतदातामध्ये १७५ जनाले मतदान गरेकामा सदस्यमा मेनुका खत्रीले ९२, सुरे नेपालीले ९२ र विज्ञा राना मगरले ८५ मत प्राप्त गरी विजयी भए ।