अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)ले त्रिभुवन विश्वविद्यालय अन्तर्गतको ठूलो आङ्गिक क्याम्पस पोखरास्थित पृथ्वीनारायण क्याम्पसमा विष्णु पोखरेललाई अध्यक्षको उम्मेद्वार बनाएको छ ।

विष्णुको नेतृत्वमा अनेरास्ववियुले पदाधिकारी र सदस्य गरेर प्रत्यक्ष लड्ने ११ जनाको टिम तयार गरेको हो । सचिवमा विराट दुवाडी, कोषाध्यक्षमा सन्दिका गुरूङ उम्मेद्वार बनेका छन् । सदस्यमा एलिशा भट्टराई, सुशील अधिकारी, विशाल लम्साल, प्रचण्ड शक्ति गुरूङ, वृषभ चालिसे, अनुजराज अधिकारी, जमुना शर्मा, सुजन शर्मा सापकोटा अनेरास्ववियुका उम्मेद्वार हुन् ।

संगठनले समानुपातिक उम्मेद्वारको नाम पनि बुझाएको छ । अनेरास्ववियु गण्डकी प्रदेश कोषाध्यक्ष विक्रम क्षेत्रीको नाम पहिलो नम्बरमा राखेर संगठनले समानुपातिक सूची बुझाएको हो । २१ सदस्यीय बन्ने स्ववियुको समितिमा १० जना समानुपातिकबाट निर्वाचित हुन्छन् । समानुपातिक सदस्य निर्वाचित भएकामध्ये एक जना उपाध्यक्ष र एक जना सहायक सचिव बन्छन् ।

को हुन् विष्णु ?

विष्णु २०५४ साल फागुन १४ मा माछापुच्छ«े गाउँपालिका–३ घाचोकमा जन्मिएका हुन् ।

उनले घाचोककै बालकल्याण प्रा.वि.मा कक्षा ५ सम्म अध्ययन गरे । कक्षा ६ देखि १० सम्म घाचोककै शुक्लागण्डकी मा.वि.मा पढे ।  कक्षा ८ मा पढ्दा उनी अनेरास्ववियुको प्रारम्भिक कमिटीमा जोडिएका हुन् । कक्षा ११ पढ्न उनी पोखरा आए । उनले राष्ट्रिय माविबाट कक्षा १२ उत्तीर्ण गरे ।

विष्णु २०७२ सालमा पृथ्वीनारायण क्याम्पसमा भर्ना भए । पृथ्वीनारायण क्याम्पस विद्यार्थी राजनीतिका लागि उर्वर भूमि मानिन्छ । मानविकी संकायतर्फ राजनीतिशास्त्र र ग्रामीण विकास अध्ययनको क्रममा उनी प्रथम वर्षमा कक्षा कमिटी उपाध्यक्ष बनेका थिए । त्यसपछि उनी अनेरास्ववियुको राजनीतिमा निरन्तर सक्रिय छन् । विष्णु हाल पृथ्वीनारायण क्याम्पसमै इतिहासमा स्नातकोत्तर गरिरहेका छन् ।

२०७३ सालको स्ववियु निर्वाचनमा सरिता पुरी नेतृत्वको अनेरास्ववियु प्यानलबाट विष्णु सदस्य पदका उम्मेद्वार थिए । २०७७ साल माघ ९ गते उनी अनेरास्ववियु क्याम्पस कमिटी संयोजक बने । २०७८ साल पुस १४ गते क्याम्पस कमिटी अध्यक्ष भए । २०७९ साल फागुनमा भएको अनेरास्ववियुको २३ औं राष्ट्रिय महाधिवेशनबाट उनी केन्द्रीय कमिटी सदस्य निर्वाचित भए ।

विद्यार्थीका मुद्दा स्थापित गर्न र विद्यार्थी राजनीतिमा विष्णु निरन्तर सक्रिय छन् । उनी अनेरास्ववियुमा लाग्दा भारतले नेपालमा नाकाबन्दी गरेको थियो । नाकाबन्दीविरुद्धको आन्दोलनदेखि कोभिड–१९ को समयमा विद्यार्थीले खोप लगाउनुपर्छ भन्ने मागमा पनि उनी सक्रिय रहे । त्यतिमात्र होइन शिक्षा संकायको कक्षा मर्ज गरेर दिउँसोमा मात्र पढाउने भन्ने विषयको पनि उनी क्याम्पस कमिटीको नेतृत्वमा रहँदा अनेरास्ववियुले निकै विरोध ग¥यो । ‘मध्यमवर्गीय विद्यार्थीले बिहान पढेर, दिउँसो काम गरेर आफ्नो जीवन चलाउन पाउनुपर्छ भन्ने आन्दोलन हामीले ग¥यौं । डेढ वर्ष लामो आन्दोलनपछि हामी सफल भयौं,’ विष्णुले सुनाए ।

कोरोना महामारीको समयमा क्याम्पसमा प्रवेश पत्रको आधारमा खोप लगाउने कुरा भएको थियो । तर, अनेरास्ववियुको पहलपछि पहिलो चरणमा परीक्षा तालिका सार्वजनिक भएका विद्यार्थीलाई, दोस्रो चरणमा परीक्षा फारम भरेका, तेस्रो चरणमास अन्य विद्यार्थीलाई खोप लगाउनुपर्छ भनेर प्रशासन र स्वास्थ्य कार्यालयसँग माग गरेको थियो ।

पृथ्वीनारायण क्याम्पस वरपरका ग्रामीण भेगबाट आउने विद्यार्थीलाई घरबाटै आउने–जाने व्यवस्था गर्ने विष्णुको पहल सफल भएको थियो । यसको सुरुआत उनले आफ्नै गृहपालिकाबाट गरेका थिए । ‘घरकै मीठोमसिनो, आँटोपीठो खाएर पढ्न पाउनुपर्छ भनेर हामीले बिहानमा बस पनि सञ्चालन गर्न सफल भयौं । माछापुच्छ«े गाउँपालिकासँग समन्वय गरेर बस पनि चलायौं,’ विष्णुले भने, ‘अहिले पनि त्यो बस चल्छ । अब अरु ठाउँबाट कसरी गर्न सकिन्छ भन्ने म स्ववियुमा निर्वाचित भएपछि पहल गर्छु ।’

२०७९ सालमा गण्डकी प्रदेश सरकारले आफन्त र पार्टीका नेताको नामको ट्रष्टमा बजेट विनियोजन गरेको थियो । त्यतिबेला अनेरास्ववियुले प्रदेश सभा परिसरमा आन्दोलन गरेर एक रुपैयाँ संकलन अभियान चलाएको थियो । यो समयमा पृथ्वीनारायण क्याम्पसको होस्टल निर्माण गर्न बजेट चाहिएकाले ट्रष्टको बजेट खारेज हुनुपर्ने विषय अनेरास्ववियु पृथ्वीनारायण क्याम्पस कमिटीले उठाएका थियो ।

पृथ्वीनारायण क्याम्पसमा आफ्नो निरन्तर सक्रियता र अनेरास्ववियुको गतिविधि आफ्नो जितको प्रमुख आधार भएको विष्णुले बताए । विद्यार्थीहरूले चुनावको समयमा मात्र सक्रिय हुनेभन्दा पनि अरू समयमा कुन संगठनको उपस्थिति छ भन्ने हेर्नुपर्ने उनको भनाइ छ ।

विष्णु विद्यार्थी संगठनबाहेक सामाजिक संस्था र अभियानमा पनि आबद्ध छन् । २०७१ सालमा समुन्नति युवा क्लब घाचोकको अध्यक्ष बनेर ‘प्लाष्टिकजन्य फोहोरमुक्त घाचोक अभियान’ चलाएका थिए । त्यस्तै परिवर्तनका लागि युवा सञ्जाल नेपाल नामक संस्थामा घाचोकलाई दूध र बदामको विशेष क्षेत्र बनाउन पहल गरेका थिए ।