पोखरा।  वरिष्ठ लोकगायक तथा संगीतकार पुरुषोत्तम न्यौपानेका गीत प्रत्यक्ष रुपमा प्रस्तुत गर्न ‘पुरुषोत्तम न्यौपाने सांगीतिक साँझ’ हुने भएको छ ।

राष्ट्रिय लोक तथा दोहोरी गीत प्रतिष्ठान नेपालको आयोजनामा चैत २२ गते पोखरा सभागृहमा सांगीतिक साँझ आयोजना हुन लागेको प्रतिष्ठान केन्द्रीय सचिव शंकर विरही गुरुङले जानकारी दिए ।

स्याङजाको कालीगण्डकी गाउँपालिका–५ बलाम बेलटारीमा विसं २०२९ सालमा जन्मिएका पुरुषोत्तम २०४६ सालमा ‘बलाम देबीथान’ बोलको गीत गाएर सांगीतिक यात्रा प्रारम्भ गरेका थिए । उनको स्वरमा हजार बढी गीत सार्वजनिक भइसकेका छन् ।

न्यौपानेका ‘सरर पानी घट्टमा’, ‘घामजस्तो चम्किलो जुन हुँदैन’, ‘रुन्छ नि मन किन रुँदैन’, ‘ऐना हेरेर’, ‘मायाले मार्‍यो’, ‘मिर्मी मुनि काली थुनेको’, ‘ढुंगेधारामा’, ‘देउरालीमा धजा’लगायत गीत चर्चित छन् । स्याङजामा जन्मिए पनि उनी पोखरामा बसेर संगीत कर्ममा आझै सक्रिय छन् । उनी रेडियो नेपालमा कार्यक्रम अधिकृत पनि हुन् ।

स्वदेशदेखि अमेरिका, अस्ट्रेलिया, क्यानाडा, युरोप, जापान, लगायतका धेरै देशहरुमा आफ्नो प्रस्तुती दिएका न्यौपाने म्युजिक नेपाल अवार्ड लगातार तीनपटक पाउने र हालसम्मकै एक मात्र कलाकार हुन् । उनले थुप्रै सम्मान, पुरस्कार र अवार्ड जितिसकेका छन् ।

जीवन संगीनी भगवती न्यौपानेसँग सुखद दाम्पत्य जीवन बिताइरहेका गायक न्यौपानेका एक छोरा र एक छोरी छन् । न्यौपाने राष्ट्रिय लोक तथा दोहोरी गीत प्रतिष्ठानका पूर्वअध्यक्ष हुन् ।

प्रतिष्ठानले गत वर्ष भदौ १५ मा ‘नारायण रायमाझी सांगीतिक साँझ २०८०’ आयोजना गरेको थियो । रीता थापाको कार्यकालबाट वर्षेनी एक प्रतिष्ठित लोकदोहोरी कलाकारलाई प्रस्तुत गर्ने कामको सुरुवात भएको हो। एक महिला नेत्रीले सम्हालेको लोक दोहोरी गीत प्रतिष्ठानको यो एक प्रतिष्ठीत कार्यक्रम हो ।