स्याङ्जाको वालिङ् नगरपालिका – ८ खेलमैदानमा जारी प्रथम पिङ्क सिटी महोत्सवमा गोर्खाली खुकुरी सबैको रोजाइमा परेको छ । फागुन २१ गतेदेखि जारी यस महोत्सवमा स्थानीयले आफ्नै सीपबाट निर्माण गरेको खुकुरी दर्शकको रोजाइमा परेको हो ।

यहाँको वालिङ् नगरपालिका – १४ रैपाला निवासी ३८ वर्षीय सन्तोष विश्वकर्माले आफूले बनाएका खुकुरीदेखि कृषि औजारहरु प्रदर्शनीमा राखेका छन् । महोत्सवमा विकले प्रवेशद्वार नजिकैको स्टलमा उनले आफ्ना उत्पादनहरु प्रदर्शनी एवं बिक्रीवितरण गरेका हुन् ।

विश्वकर्माले आफ्नो सीपको सदुपयोग गरी बनाई प्रदर्शनीमा राखेको ५ फीट १० इन्च लम्बाईको गोर्खाली खुकुरी भने सबैको रोजाइमा परेको छ । ३० केजी तौल भएको यो खुकुरी किनेर लैजानको लागि एक लाख एघार हजार एक सय एघार रुपैयाँ राखिएको विश्वकर्माले बताए । उक्त खुकुरी मन पराएर यहाँ आएका दर्शकले अर्डर समेत गरेको उनले बताए ।

उनले फलामबाट बन्ने हसिया, फाली, बन्चरो, कोदाली, खुकुरी, चक्कु, दाउ तथा तरवारलगायतका सामाग्री बनाउँदै आएको बताए । उनले राखेका खुकुरी र कृषिऔजारको प्रचारप्रसार मात्रै भएको छैन, बजारीकरण समेत भएको छ । यहाँबाट केही औजारहरु बिक्री भैसकेका छन् भने अर्डर पनि आएका छन् । घरायसी कामका लागि यी औजारहरु प्रयोग हुने हुँदा महोत्सवमा आएका दर्शकले लिएर जाने गरेको विश्वकर्माले बताए ।

उनले आफूले बनाएका यस्ता किसिमका सामाग्रीहरु घरबाटै बिक्रीवितरण गर्ने गरेको र मेला महोत्सवमा समेत स्टल लिएर प्रदर्शनी एवं बिक्रीवितरण गर्दै आएको बताएका छन् । महोत्सवले आफूले उत्पादन गरेका सामाग्रीहरुको बजारीकरण र प्रचारप्रसारमा टेवा पुर्‍याएको विकको भनाइ छ ।

मौलिक तथा परम्परागत प्रविधिको प्रयोग गर्दै आफ्नो पुस्तौंदेखि चलिआएको कला, सीप अबका पुस्तालाई हस्तान्तरण गर्न भने अलि गार्‍हो रहेको पनि विकले बताएका छन् । अहिलेका पुस्ताहरु यहाँ माध्यमिक तहसम्म पढेर बाहिरिँदै गएको अवस्थामा आफ्नो पुस्तापछिका अर्का पुस्तालाई परम्परागत सीप हस्तान्तरण गर्न गार्‍हो रहेको उनको भनाइ छ ।

वालिङ् चेम्बर अफ कमर्सको आयोजनमा जारी महोत्सवमा स्थानीय सीप तथा उत्पादनलाई प्राथमिकता दिइएको संस्थाका उपाध्यक्ष मणि प्रसाद पङ्गेनीले बताए । महोत्सवका स्टलमा राखिएका ती सामाग्रीले यहाँका स्थानीय सीपलाई झल्काएको मात्रै छैन, उत्पादित सामाग्रीको प्रचारप्रसार र बजारीकरणमा समेत टेवा पुग्ने उपाध्यक्ष पङ्गेनीको विश्वास छ ।

‘आर्थिक सामाजिक सम्पन्न समाज, समृद्ध वालिङ्’ भन्ने नाराका साथ वालिङ् चेम्बर अफ कमर्सले सञ्चालन गरेको महोत्सव चैत ३ गतेसम्म चल्नेछ । महोत्सवमा करिब चार सय स्टल रहेका छन् ।