पोखरा । निमोनिया भई पोखराको ओम हस्पिटलमा उपचाररत गण्डकी प्रदेशका प्रदेश प्रमुख डिल्लीराज भट्टको स्वास्थ्य अवस्थामा सुधार आएको छ ।

प्रदेश प्रमुखको सचिवालयका अनुसार निरन्तर खोकी लागेर विहीबार साँझ अस्पताल भर्ना भएका भट्टमा निमोनिया देखिएको थियो ।

बरिष्ठ छाती रोग विशेषज्ञ डा. सीपी आचार्य नेतृत्वको चिकित्सकीय टोलीले उपचार गरिरहेका छन् । अझै केही दिन प्रदेश प्रमुख अस्पतालमै रहनेछन् ।

चिकित्सकको सल्लाहअनुसार प्रदेश प्रमुखको स्वास्थ्य सुरक्षाको ख्याल गर्दै हाल प्रत्यक्ष भेटघाटका सबै कार्यक्रम अर्को सूचना जारी नभएसम्मका लागि स्थगित गरिएको जनाइएको छ ।

शुक्रबार बिहानैदेखि साँझसम्म भेटघाट बाक्लिएपछि अस्पतालले स्वास्थ्य सुरक्षा संवेदनशीलतालाई ख्याल गर्दै भेटघाट बन्द गरिएको डा. आचार्यले बताए ।

साताव्यापी लामो सुदूरपश्चिम भ्रमण गरी फर्किएका भट्टलाई चिसोको कारण श्वासप्रश्वासमा समस्या भएको प्रेस संयोजक रञ्जन अधिकारीले जानकारी दिए ।