काठमाडौँ । काठमाडौँको ठमेलमा ड्युटीमा खटिएका प्रहरीमाथि हातपात भएको छ ।

बिहीबार राति ड्युटीमा खटिएका दुई प्रहरीमाथि हातपात भएको जिल्ला प्रहरी परिसर काठमाडौँले जनाएको छ ।

प्रहरी वृत्त, दरबारमार्गअन्तर्गतको केशरमहल बिटबाट खटिएको क्विक रेस्पोन्स टीम (क्युआरटी) का प्रहरीमाथि गए राति १२ बजे आक्रमण भएको हो । आक्रमण गर्ने व्यक्तिहरु अस्कल क्याम्पसमा अध्ययनरत विद्यार्थी नेताहरु रहेको आशंका गरिएको छ । यसबारे पुष्टि गर्न बाँकी रहेको प्रहरीले जनाएको छ ।

प्रहरीले सीसीटीभी फुटेजमार्फत व्यक्ति पहिचानको काम भइरहेको बताएको छ । प्रहरीका अनुसार मदिरा पिएको ५/६ जनाको समूहले प्रहरीमाथि हातपात गरेको थियो । हातपात गर्ने व्यक्तिको खोजी सुरु गरिएको छ ।

आक्रमणबाट प्रहरी हवल्दार जगुलाल घर्तीको टाउकोसहित शरीरका विभिन्न भागमा गम्भीर चोट लागेको छ । प्रहरी जवान नगेन्द्रराज विष्टको आँखा र अन्य भागमा गम्भीर चोट लागेको प्रहरी स्रोतले जनाएको छ । उनीहरूको ट्रमा सेन्टरमा उपचार भइरहेको छ ।