अछाम । अछामको ढकारी गाउँपालिका–१ का १४ वर्षीया इशरा खड्का र १५ वर्षीया सरस्वती खड्काको हत्या भएको प्रहरीले पुष्टि गरेको छ । घटना प्रेम प्रस्ताव अस्वीकार गर्दा घटेको प्रहरीको निष्कर्ष छ ।

घटनाबारे अछाम प्रहरीले शनिबार बिहान पत्रकार सम्मेलन गरेर जानकारी गराएको हो । १७ र १५ वर्षका दुई जना किशोरले हत्या गरेको खुलेको हो । उनीहरूले घटनामा आफ्नो संलग्नता स्वीकार गरेका छन् । उनीहरूलाई ज्यान मार्ने कसुरमा जिल्ला अदालत अछामबाट पाँच दिनको म्याद थप गरेर अनुसन्धान भइरहेको प्रहरीले जनाएको छ ।

हत्या गरिनुको मुख्य दुईवटा कारण खुलाइएको छ । जसमा मायाको चिनो चुन्नी माग्दा नदिएको, शारीरिक सम्पर्कको प्रस्ताव अस्वीकार गर्दा हत्या भएको उल्लेख छ ।

प्रहरीले उनीहरुको परिवर्तित नाम (६९ मंगलसेन ७३) र (६९ मंगलसेन ७६) राखेको छ । बालक भएकाले उनीहरुको नाम नखुलाइएको अछामका प्रहरी नायव उपरीक्षक ईश्वरीप्रसाद भण्डारीले बताए ।

प्रहरीका अनुसार अनुसन्धानका क्रममा मृतक इशरालाई १५ वर्षीय बालक र  र मृतक सरस्वती खड्कालाई १७ वर्षका  किशोरले प्रेम गर्ने खुलेको छ । ती बालकहरुले यो कुरा स्वीकार गरेको प्रहरीले जनाएको छ ।

१७ वर्षका  किशोरले सरस्वतीसँग मायाको चिनो चुन्नी मागेका थिए । ‘उनले दिन अस्वीकार गरिन,’ डीएसपी भण्डारीले भने, ‘सोही व्यक्तिले सरस्वतीलाई शारीरिक सम्पर्कका लागि प्रस्ताव गरे । सरस्वतीले उनको त्यो प्रस्ताव पनि अस्वीकार गरिन् ।’

यही विषयमा विवाद भई दुई किशोरीको हत्या भएको प्रहरीको निष्कर्ष छ । अघिल्लो शुक्रबार बाख्रा चराउन गएका दुई जना किशोरी अर्को दिन शनिबार शरीरमा ढुङ्गाले थिचेको अवस्थामा मृत फेला परेका थिए ।

घटना विवरणः

दुवै किशोर हत्याको दुई दिनअघि मङ्गलसेनबाट डुफा आएका थिए । प्रहरीकाअनुसार उनीहरूले पटकपटक फोन गरेर भेट्न बोलाएको देखिन्छ ।

माघ ११ गते भेट्ने योजना बनाई बिहान १० बजे खोलामा गई केटीहरूलाई ढुकेर बसेका थिए । मृतक दुवै केटी १२ बजे रिमरौहा खोला नजिकैको खोरबाट बाख्रा ल्याई नजिकैको वनमा चराउन आएका थिए ।

त्यसपछि ती दुवै किशोरसँग उनीहरूको भेट भएको पाइएको प्रहरीले बताएको छ । सरस्वतीले मोबाइलबाट नाम परिवर्तित ६९ मंगलसेन ७६ को सेयर इटबाट भिडिओ सेयर गरेका थिए । त्यसपछि सोही जङ्गलमा रहेको छिन्ने ओडार भन्ने स्थानमा रहेको ठूलो ढुङ्गामा ती दुई सरस्वती र इशरासँग बसेका थिए ।

ती दुवै किशोरले सरस्वती र इशरासँग माया चिनो भनेर दोपट्टा मागेका थिए ।

डीएसपी भण्डारीले भने, “इशराको सेतो दोपट्टा खोसेर परिवर्तित नाम ६९ मंगलसेन ७३ ले लिए । तर, सरस्वतीले भने दोपट्टा ६९ मंगलसेन ७६ लाई दिन मानिनन् । त्यसपछि उनले सरस्वतीको इयरफोन खोसे । इयरफोन आफ्नो दाइको भन्दै इशराले ६९ मंगलसेन ७६ सँग फिर्ता मागेकी थिइन् ।”

ढुङ्गामा बसेका उनीहरूबीच दोपट्टा खोसाखोस भएपछि विवाद सुरु भएको देखिन्छ ।

विवादपछि इशरा बाख्रा हेर्ने भन्दै जङ्गलतर्फ लागिन् । सरस्वती ढुङ्गाको तलतिर उभिएकी थिइन् ।

“सोही समयमा ६९ मंगलसेन ७६ ले सरस्वतीलाई यौन सम्पर्क गर्न दिन प्रस्ताव राखेको देखिन्छ । तर, सरस्वती उनको प्रस्तावलाई अस्वीकार गर्दै खोलातर्फ लागिन् । सोहीक्रममा किशोरले ढुंगाले सरस्वतीको टाउको पछाडि प्रहार गरे । सरस्वती ढुङ्गाको प्रहारबाट बेहोस् भइन् र भुइँमा ढलिन् । उनको त्यही मृत्यु भएको देखिन्छ ।” भण्डारीले घटनाबारे भने ।

त्यसपछि इशराले घटनाबारे थाहा नपाओस् भनेर उनको पनि हत्या गरेको पाइएको छ ।

डीएसपी भण्डारीले भने, “इशरा साथी ढलेका स्थानमा पुग्दा बेहोस् देखिन् । ती केटाहरूले यो घटनाबारे कसैलाई नभन्नु भनेर भने । इशरा घटनापछि घर जान खोज्दा केटाहरूले छेके र धकेले । ६९ मंगलसेन ७३ ले ढुङ्गा समातेर इशराको निधारमा प्रहार गरे । ढलेको अवस्थामा अर्का केटाले पनि इशराका निधारमा हानेर हत्या गरे ।”

पक्राउ परेका दुई किशोरले हत्या गरेको स्वीकारेको र अन्यको संलग्नताबारे अनुसन्धान भइरहेको प्रहरीले जनाएको छ ।

जिल्ला अदालतबाट पाँच दिनको म्याद थप गरेर उनीहरुमाथि अनुसन्धान गरिरहेको छ ।

घटनामा केन्द्रीय अनुसन्धान ब्यूरो (सीआईबी) प्रदेश प्रहरी कार्यालय धनगढी, नेपाल प्रहरी प्रदेश कार्यालय महेन्द्रनगर र जिल्ला प्रहरी कार्यालय अछामको टोलीले अनुसन्धान गरिरहेको छ ।