पोखरा । देशका केही स्थानमा बदली र हिमपातको सम्भावना रहेको जल तथा मौसम पूर्वानुमान महाशाखाले जनाएको छ।

जल तथा मौसम पूर्वानुमान महाशाखाका अनुसार हाल देशमा पश्चिमी न्यून चापीय प्रणालीको प्रभाव रहेको छ।

अहिले गण्डकी, कर्णाली र सुदूरपश्चिम प्रदेशको पहाडी भू-भागमा आंशिक बदली भएको छ भने बाँकी क्षेत्रमा मौसम मुख्यतया सफा रहेको छ। तराईका धेरै भू-भागहरूमा हुस्सु र कुहिरो लागेको छ।

दिउँसो सुदूरपश्चिमका पहाडी भू-भागका एक, दुई स्थानमा हल्का वर्षाको पनि सम्भावना रहेको छ। कर्णाली प्रदेश र सुदूरपश्चिमका उच्च पहाडी तथा हिमाली भू-भागका थोरै स्थानहरू र गण्डकीको एक, दुई स्थानमा हल्का हिमपातको सम्भावना रहेको छ।

यस्तै, राति कोशी प्रदेशमा पनि उच्च पहाडी र हिमाली क्षेत्रमा मौसम आंशिक बदली भइ हल्का हिमपातको सम्भावना रहेको महाशाखाले जनाएको छ। मधेशमा भने मौसम पूर्णरुपमा सफा रहनेछ ।