राष्ट्रिय स्वतन्त्र पार्टी (रास्वपा) का सभापति रवि लामिछाने कास्की प्रहरी हिरासतभित्र सुतिरहेको तस्वीर खिचेको आरोपमा यसअघि पक्राउ परेर छुटेका डा. निकोलस भुसाल फेरि समातिएका छन् ।

यसअघि, कास्की अदालतले हिरासतबाहिरै राखेर अनुसन्धान गर्न भनेकामा अनुसन्धान सकिँदा पुनः पक्राउ गर्नुपर्ने अवस्था आएको कास्की प्रहरीले बताएको छ ।

पुस ७ गते पक्राउ गरी भोलिपल्टैपोखरा ल्याएर अदालतमा म्याद थपका लागि उपस्थित गराउँदा अदालतले थुनामा नपठाइकन अनुसन्धान गर्न भनेको थियो । फोटो आफूले खिचेको र खराब नियत राखेर सार्वजनिक नगरेको उनले बताएका थिए ।

न्यायाधीश नारायण दाहालको इजलासले हिरासतमा राखेर अनुसन्धान गर्न अनुमति नदिँदा तत्काल छुटेका भुसाल त्यतिबेलाकै साइबर अपराधको अभियोगमा फेरि समातिएका हुन् ।

अहिले प्रहरीले अनुसन्धानका क्रममा प्रमाण भेटाएपछि पक्राउ गरिएको र भुसाललाई शुक्रबार अदालतमा पेश गरिने प्रहरी बताउँछ ।