स्याङ्जाको अर्जुनचौपारी गाउँपालिकाले महिलालक्षित मादल बजाउन सिकाउने तालिम प्रदान गरेको छ । तीन चरणमा प्रदान गरिने तालिम गत आइतबारदेखि गाउँपालिकाको सभाहलमा सुरु भएको हो ।

गाउँपालिका अध्यक्ष प्रकाश तिवारीले लोक संस्कृतिको संरक्षणका लागि मादल बजाउने तालिम सञ्चालन गरेको जानकारी दिए । स्थानीय बाजा संरक्षणमा पालिका लागिपरेको बताउँदै अध्यक्ष तिवारीले यस्ता किसिमका तालिमले स्थानीय मौलिक बाजा संरक्षणमा भूमिका खेल्ने बताए ।

गाउँघरमा हुने विवाह, व्रतवन्धलगायत विभिन्न धार्मिक – सांस्कृतिक कार्यक्रममा स्थानीय मौलिक बाजा प्रयोग हुने हुँदा यस्ता तालिमले लोक संस्कृति संरक्षणमा टेवा पुग्ने अध्यक्ष तिवारीको भनाइ थियो ।

पहिलो चरणको तालिम वडा –१ र ६ का आमा समूहलाई प्रदान गरी बिहीबार सकिएको छ । दोस्रो चरणमा वडा –२ र ३ र तेस्रो चरणमा वडा –४ र ५ का आमा समूहलाई प्रदान गरिने सूचना प्रविधि शाखाकी कर्मचारी लोक कुमारी काफ्लेले जानकारी दिइन् ।

तालिममा अर्जुनचौपारी गाउँपालिकाभित्रका ६२ आमा समूह तथा महिलाले नेतृत्व गरेका संघसंस्थाका १३३ जना सहभागी रहेका छन् । तीन चरणमा प्रदान गरिने तालिम माघ १० गतेसम्म चल्नेछ । मादल बजाउने तालिममा प्रशिक्षण कलाकार तथा वाद्यवादक श्याम घर्ती जिटीले प्रदान गरेका छन् ।