तिमी गयौ शिखरै चढेर, मैले उठ्न सिक्दैछु लडेर
फेरियौ मायालु आफै जानी जानी
मलाई पाइला पाइलामा रूवाउन सफल छौ
कसरी असफल भयौ र ? तिम्रो जिन्दगानी

मुटुमै बिझ्ने यी शब्दहरु हुन् डा. शिव सुवेदीको । उनै गीतकार तथा संगीतकार डा. सुवेदीले पुनः नयाँ गीत सार्वजनिक गरेका छन् ।

डा. सुवेदीले ‘फेरियौ मायालु’ बोलको गीत सार्वजनिक गरेका हुन् । दुई दिनअघि आफ्नै युट्युब च्यानलमार्फत उनले नयाँ गीत सार्वजनिक गरेका हुन् ।

गीतमा अहिलेका चर्चित गायिका समीक्षा अधिकारी र गायक कुशल बेलवासेको स्वर सुन्न सकिन्छ। माया–प्रेमको यो भाकालाई म्युजिक भिडियोमा उतारिएको छ। म्युजिक भिडियोलाई बिनोद भण्डारीले निर्देशन गरेका छन् भने सम्पादन मनोज कार्कीले गरेका हुन् । पछिल्लो समयका व्यस्त मोडल अनिल पौडेल, स्मारीका ढकाल र सुरेश कोलीले भिडियोमा अभिनय गरेका छन् ।

गीतकार सुवेदी र मोडल अनिल पौडेलको यो पहिलो सहकार्य भने होइन । मोडल पौडेलले पनि धेरे चर्चित गीतहरुमा अभिनय गरिसकेका छन् । सुवेदी भूकम्पविद् हुन् भने पौडेल इन्जिनियर हुन् ।

डा. सुवेदीको घाम जस्तो चम्किलो जुन हुँदैन, भुल्नै भयो धौ, कसको अनुमतिलगायत दर्जनौं गीत रुचाइएका छन् ।