सल्यान । सल्यानमा एक महिलाले आफ्ना दुई छोरीको हत्या गरेकी छन्। बिहान बनगाड कुपिण्डे नगरपालिका–११ सिस्नेपातलमा २५ वर्षीया आमा पूर्णिमा रानाले आफ्ना दुई छोरीको हत्या गरेकी हुन्।

घटनास्थल पुगेको प्रहरी टोलीले सोधपुछ गर्दा पूर्णिमाले नै हत्या गरेको स्वीकार गरेकी छन्। उनले ३ वर्षीया छोरी करिष्मा र ६ महिनाकी छोरी राघवीको हत्या गरेकी हुन्। बालिकाका बुबा टेकमान राना भने रोजगारीका क्रममा नुवाकोटमा रहेको प्रहरीले जनाएको छ।

प्रहरीले सोधपुछ गर्दा पूर्णिमाले श्रीमानसँग बेलाबेलामा हुने घरायसी विवादका कारण छोरीहरूको हत्या गरेको स्वीकारेको जिल्ला प्रहरी कार्यालय सल्यानले जनाएको छ। कपडाको सलले घाँटी थिचेर आफूले छोरीहरूको हत्या गरेको प्रहरीसँगको बयानमा भनेकी छन्।

प्रहरी टोलीले घटनास्थलको मुचुल्का उठाएर शव पोस्टमार्टमका लागि जिल्ला अस्पताल पठाएको छ। प्रहरीले पूर्णिमालाई नियन्त्रणमा लिएर अनुसन्धान अघि बढाएको जनाएको छ।