पोखरा रंगशालामा आगामी माघ २२ देखि फागुन ३ गतेसम्म हुने २४ औं आहा रारा पोखरा गोल्डकप फुटबल प्रतियोगिता हेर्नेमध्ये दैनिक भाग्यमानी दुई जनाले सुविधासम्पन्न चरक हस्पिटलमा स्वास्थ्य जाँच गर्ने मौका पाउने भएका छन् ।

मोफसलकै गर्वलायक प्रतियोगितालाई चरकले सहप्रायोजन गर्दै लक्की ड्र गरी दैनिक दुई जनालाई होल बडी चेकअप गर्ने भएको हो । सहप्रायोजन वापत चरकले डेढलाख रुपैंया प्रतियोगिता सम्पन्नार्थ क्लबलाई प्रदान गर्ने सहारा क्लबका पूर्व अध्यक्ष विक्रम थकालीले जानकारी दिए ।

हस्पिटलका तर्फबाट प्रबन्ध निर्देशक कपिल पोखरेल र आयोजक सहारा क्लब पोखरातर्फबाट अध्यक्ष केशवराज बरालबीच सम्झौतापत्रमा हस्ताक्षर भएको हो । गत वर्षदेखि नै चरकले सहप्रायोजन गरेको हो ।

पोखरा ८, नागढुंगास्थित चरक मेमोरियल पोखराको सुविधासम्पन्न अस्पताल हो । विभिन्न मेला महोत्सवमा पनि चरक यसरी नै सहकार्य गर्दै अघि बढेको छ । जिल्ला जिल्लामा निःशुल्क स्वास्थ्य शिविरमा पनि प्राविधिक सहयोग गरिरहेको छ ।

नेपालको फुटबल इतिहासमा निरन्तर सञ्चालित एकमात्र प्रतियोगिता आहा ! रारा गोल्डकप हो । ‘खेलकुदको विकासमा सहकार्य गरौं, पोखरालाई खेलकुद पर्यटन शहरको रुपमा स्थापित गरौं’ भन्ने सन्देशमूलक उद्देश्यका साथ पोखरा रंगशालामा साढे दुई दशकदेखि बर्सेनि आयोजित यो प्रतियोगिता पोखराको पहिचानसमेत हो ।

प्रतियोगिताको मुख्य प्रायोजक हिमश्री फुड्स प्रालिको उत्पादन आहा तथा रारा चाउचाउ हो । ‘आत्मा साक्षी राखी मन वचन र कर्मले सामाजिक सेवा गरौं’ भन्ने उद्देश्यअनुरुप फुटबलमार्फत सहारा कलब सामाजिक सेवा निरन्तर क्रियाशील छ । क्लबले पोखरा १७, दोबिल्लामा सूर्यबहादुर के.सी. स्मृति सहारा फुटबल एकेडेमी संचालन गरेको छ ।

हाल चौथो ब्याजको रुपमा एकेडेमीमा आश्रित कठिन परिस्थिति र विपन्न वर्गका ३० जना बालकहरु छन् । फुटबल प्रतियोगिताबाट हुने आम्दानी एकेडेमीमा आश्रित बालिकहरुको उचित शिक्षादीक्षा, आवास र दैनिक फुटबल प्रशिक्षणमा क्लबले खर्च गर्दै आएको क्लब अध्यक्ष केशवराज बरालले बताए ।

सम्बन्धित समाचारः

आहा रारा पोखरा गोल्डकप हेर्दा दैनिक दुई जनालाई चरकमा ‘होलबडी चेकअप’