छिमेकी प्रतिष्ठान स्याङ्जाले न्यानो कपडा वितरण गरेको छ । प्रतिष्ठानले भीरकोट नगरपालिका ६ नं वडा कार्यालयको समन्वयमा यहाँका विपन्न परिवारलाई न्यानो माया स्वरुप ४७ थान ब्लाङ्केट वितरण गरेको हो ।

एक कार्यक्रमकाबीच प्रतिष्ठानले भीरकोट ६ र ८ नं वडाका विपन्न तथा बिरामीहरुलाई आर्थिक सहयोग समेत गरेको छ । यहाँका टुल्की माझीलाई नगद पाँच हजार रुपियाँ, कुलबहादुर कामीलाई पाँच हजार रुपियाँ र जितेन्द्र नेपालीलाई १० हजार रुपियाँ प्रदान गरेको हो ।

कार्यक्रममा प्रतिष्ठानको सामाजिक कार्यको प्रशंसा गर्दै नगरप्रमुख गोविन्दकुमार कर्माचार्यले समाजलाई आत्मनिर्भर बनाउन सबैले योगदान दिनुपर्ने धारणा व्यक्त गरेका थिए ।

जाडो याममा न्यानो कपडा वितरण गरेर प्रतिष्ठानले सह्रानीय काम गरेको निवर्तमान नगरप्रमुख छायाराम खनालको भनाइ थियो । खनालले प्रतिष्ठानद्वारा वितरण गरिएको न्यानो कपडा कपडा मात्र नभएर यो एक छिमेकीले अर्को छिमेकीलाई प्रदान गरेको सद्भाव र प्रेम भएको बताएका थिए ।