धादिङको त्रिपुरासुन्दरी गाउँपालिका वडा नं. ६ मा रहेको भीमोदय माध्यमिक विद्यालयले आफ्नो ४७ औं वार्षिकोत्सव कार्यक्रम सम्पन्न गरेको छ ।

यस विद्यालयले गत शैक्षिक सत्रमा एईई परीक्षामा सामुदायिक विद्यालयतर्फ शत प्रतिशत विद्यार्थी उत्तीर्ण गरी जिल्लामै उत्कृष्ट बन्न सफल भएको थियो ।

कार्यक्रमका प्रमुख अतिथि बागमती प्रदेशका भौतिक विकास तथा पूर्वाधार मन्त्री अमन कुमार मास्केले विद्यालयको गुणस्तरीयता र शिक्षण पद्धतीप्रति सन्तुष्टी व्यक्त गर्दै भौतिक पूर्वाधार लगायत अन्य पक्षमा आफ्नो ध्यान गएको र सक्दो पहल गर्ने बताए ।

विद्यालय व्यवस्थापन समितिका अध्यक्ष देवबहादुर बसौलाको अध्यक्षतामा भएको कार्यक्रममा विद्यालयका प्रधानाध्यापक विष्णुहरि शाहल खेलमैदानको अभावले गर्दा विद्यालय स्तरीय खेलकुद प्रतियोगिताहरुमा विद्यार्थीलाई तयार गर्न नपाएको र सहभागी हुन विमुख हुनु परेको गुनासो गरेका थिए ।

वडा अध्यक्ष हरि बहादुर बिकले पनि खेलकुद लगायत अतिरिक्त क्रियाकलापका लागि आवश्यक बजेट विनियोजन गरिदिन प्रदेश सरकारको ध्यानाकर्षण गराएका थिए ।

सोहि कार्यक्रममा धादिङ्ग पोखरा सम्पर्क समाज र धादिङ्ग युके सम्पर्क समाजबाट स्थापना गरिएको अक्षयकोषबाट बिद्यार्थीहरुलाई छात्रवृत्ति वितरण गरिएको थियो ।

• राजकुमार बस्याल