पोखरा । बागलुङको ढोरपाटन नगरपालिकामा निर्मित अस्पताल नगरपालिकाभर सार्वजनिक बिदा दिएर उद्घाटन गरिएको छ।

गण्डकीका मुख्यमन्त्री सुरेन्द्रराज पाण्डेले ५० शय्याको बुर्तिबाङ अस्पतालको शुक्रबार उद्घाटन गरे । मुख्यमन्त्रीसहित गण्डकीका स्वास्थ्यमन्त्री कृष्णप्रसाद पाठक, प्रदेश सभा सदस्य द्रोण कुँवरलगायत उक्त कार्यक्रममा सहभागी थिए ।

तत्कालीन बुर्तिबाङ स्वास्थ्य केन्द्रलाई ५० बेडको प्रादेशिक अस्पताल बनाइएको र त्यसैको भवन उद्घाटन हुने खुसीमा बिदा दिइएको नगरपालिकाका कार्यबहाक मेयर धनबहादुर कायत बताए ।

नगरकार्यपालिकाको मंसिर १८ गते बसेको बैठकको निर्णयअनुसार अस्पताल उद्घाटन गर्न पालिकाभर सम्पूर्ण सरकारी कार्यालय, विद्यालय, स्वास्थ्य संस्था र गैरसरकारी कार्यालयलाई स्थानीय बिदा दिइएको हो । पालिकाका प्रमुख प्रशासकीय अधिकृत चिरञ्जीवी घिमिरेले बिहीबार सूचना नै निकालेर स्थानीय सार्वजनिक बिदा दिइएको जानकारी गराएका थिए ।