नेपाल पत्रकार महासंघ लमजुङ शाखाको अध्यक्षमा सन्देश पौडेल विजयी भएका छन् ।

विजयी पौडेलले २६ मत पाए भने उनका निकटतम प्रतिद्वन्दी अनुज अधिकारीले ५ मत पाएका थिए । प्रेस चौतारी र प्रेस यूनियन गठबन्धनको निर्णय अनुसार लमजुङ यूनियनको भागमा परेपछि चौतारीका अधिकारीले यसको अवज्ञा गर्दै आफै अध्यक्षमा उठेका थिए ।

पत्रकार महासंघ लमजुङ शाखाको शुक्रबार भएको ८ औँ अधिवेशनबाट भारी मतका साथ अध्यक्षमा पौडेल विजयी भएका हुन् । लमजुङमा अन्य पदमा सर्वसम्मत भएपनि अध्यक्षमा मात्र निर्वाचन भएको हो ।

उपाध्यक्षमा वेलिना थापा, महिला उपाध्यक्षमा बसन्ता भट्ट बानिया सर्वसम्मत निर्वाचित भएका छन्। यस्तै, सचिवमा कृष्ण आले, कोषाध्यक्षमा निरज अधिकारी पनि सर्वसम्मत चुनिए ।

यस्तै, शाखाको सहसचिव पदमा श्रीकला भण्डारी र सीताराम बसेल सर्वसम्मत बने । सदस्यहरुमा आस बहादुर गुरुङ, घन बहादुर घिमिरे जिवी, शान्ता कमली, सविना प्रजा, सुनिता भुजेल, शिला सेन्चुरी चुनिएका छन् ।

३४ मतदाता रहेको लमजुङको निर्वाचनमा ३२ मत खसेको थियो भने १ मत बदर भएको थियो ।